Conto Pararem LPD

MURDHA CITTA

Om Swastyastu

Om Awighnam Astu Nama Sidham

            Malarapan antuk pasuwecan lan asung kerta waranugraha Ida Sang Hyang Widhi Wasa, Bhatara Bhatari sane malinga linggih ring Kahyangan Desa Adat Presana, wastu prasida kasurat Pararem Desa Pakraman Presana Indik Lembaga Perkreditan Desa (LPD) Desa Adat Presana.

            Pararem Desa Adat Presana puniki maka sepat siku – siku pamatut sakaluwiring pemargin Lembaga Perkreditan Desa ( LPD) Desa Adat Presana, ugi prasida kasungkemin prayojana sami, angidep muah amanggehaken kadi awig-awig utawi pararem indik Lembaga Perkreditan Desa (LPD) Desa Adat Presana.

SARGAH I

ARAN LAN WAWIDANGAN

Pawos 1

1.      Lembaga  Perkreditan Desa sane kamanggehang puniki mawasta Lembaga  Perkreditan   Desa, Desa Adat Presana sane kasurat kalih kinucap LPD Adat Presana

2.      LPD Desa Adat Presana puniki kadruwenang olih Desa Adat Presana, kaempon olih krama Desa Adat Presana.

SARGAH II

PAMIKUKUH LAN TETUJON

Pawos 2

Lembaga Perkreditan Desa (LPD) ngemanggehang pamikukuh minakadi :

1.      Peraturan Daerah Provinsi Bali Nomor 3 Tahun 2003 Tentang Perubahan Atas Peraturan Daerah Propinsi Bali Nomor 3 Tahun 2001 Tentang Desa Pakraman;

2.      Peraturan Daerah Propinsi Bali Nomor : 8 Tahun 2002 tentang Lembaga Perkreditan Desa (Lembaran Pemerintah Daerah Provinsi Bali Tahun 2002 Nomor 20, Tambahan Lembaran Daerah Propinsi Bali Nomor 3) sebagaimana beberapa kali telah diubah, terakhir dengan Peraturan Daerah Propinsi Bali Nomor 4 Tahun 2012 tentang Perubahan Kedua Atas Peraturan Daerah Propinsi Bali Nomor 8 Tahun 2002 tentang Lembaga Perkreditan Desa (Lembaran Daerah Propinsi Bali Tahun 2012 Nomor 4 ).;

3.      Peraturan Gubernur Bali Nomor : 11 Tahun 2013 tentang Pelaksanaan Peraturan Daerah Propinsi Bali Nomor 8 Tahun 2002 tentang Lembaga Perkreditan Desa, sebagaimana telah diubah beberapa kali terakhir dengan Peraturan Daerah Propinsi Bali Nomor 4 Tahun 2012 tentang Perubahan Kedua Atas Peraturan Daerah Propinsi Bali Nomor 8 Tahun 2002 Tentang Lembaga Perkreditan Desa (Berita Daerah Propinsi Bali Tahun 2013 Nomor 11);

4.      Surat Keputusan Gubernur Bali Nomor 767/01-D/HK/2009 Tanggal 9 Juli 2010 Tentang LPD Desa Adat Presana

5.      Awig-Awig Desa Adat Presana;

6.      Pamutus Paruman Desa Adat Presana;

Pawos 3

Maka Tetujon LPD Adat Presana:

1.      Ngerajegang lan nincapang kasukertan Desa Adat Presana, saha pawongannya sakala lan niskala

2.      Nincapang  tata sukerta pakraman.

3.      Ring sajeroning ngemargiang putusan ngelarang paras paros sarpanaya lan salunglung sebayantaka

SARGAH III

UTSAHA LAN MODAL

Pawos 4

Utsaha – utsaha LPD Adat Presana minakadi :

a.       Nerima Simpenan saking krama Desa Adat Presana, marupa simpenan sukarela, simpenan wajib, simpenan berjangka lan simpenan tyosan;

b.      Nguwehin jinah ring krama Desa Adat Presana sane mabuat nyelang jinah, manut kawigunan ipun;

c.       Nerima jinah sangkanin nyelang ring lembaga kauwangan tyosan malarapan antuk pamutus Paruman Prajuru Desa Adat Presana;

d.      Nyarengin utawi penyertaan modal ring utsaha sane tyosan druwen Desa Adat Presana malarapan antuk pamutus Paruman Prajuru Desa Adat Presana;

e.       Utsaha – utsaha sane tyosan manut pamutus Paruman Prajuru Desa Adat Presana

Pawos 5

1.      Modal sane kaanggen ngerajegang utsaha LPD Adat Presana, luire:

a.       Wantuan saking Pemerintah Provinsi Bali (Modal Awal) 20,000,000;

b.      Wantuan saking Desa Adat Presana (Modal Awal) 28,000,000;

2.      Modal selantur ipun saking sisa hasil utsaha sane kamolihang antuk LPD

SARGAH IV

UGER UGER MANGGALA LPD

Palet 1

Manggala LPD

Pawos 6

1.      Manggala LPD Desa Adat Presana inggih punika:

a.       Panureksa sane kasinanggeh Pengawas Internal;

b.      Prajuru  LPD;

c.       LPD dados  kawewehin antuk  karyawan pinaka narapraja  manut kawigunan lan kawentenan kauwangan LPD;

2.      Pengawas internal minakadi :

a.       Ketua lan sanistanya kalih diri anggota;

b.      Sane kahadegang dados Ketua  Pengawas Internal inggih punika Kelian Desa Adat Presana Anggota Pengawas internal kasudi antuk Paruman Prajuru Desa;

c.       Ketua lan anggota pengawas internal tan kalugra  ngerangkep dados Prajuru  LPD;

Pawos 7

Sane dados kahadegang anggota pengawas internal LPD luwire:

a.       Krama Desa sane munggah ring lekhitan banjar adat sajeroning Desa Adat Presana, turmaning jumenek magenah ring wawidangan Desa Desa Adat Presana;

b.      Madruwe ijasah sanistanya puput masekolah ring SMA tur kapineh nyandang dados anggota pengawas internal;

c.       Mayusa sanistanya kalih dasa lima (25) warsa utawi sampun nahen merabiyan;

d.      Waras tur nenten sungkan – sungkanan;

e.       Satya, teher tur madruwe rasa wirang ring LPD;

f.       Uning ring pamargin tata kelola kauangan;

g.      Kayun kasumpah kalih manut ring sahananing pituduh prajuru desa pakraman;

Pawos 8

Swadarmaning Pengawas Internal luwire:

a.       Mratyaksayang kawentenan lan pemargi utawi pengelolaan  LPD ;

b.      Ngicenin pemargi lan piwarah ring Prajuru  LPD sajeroning nincapang kawigunan kamolihan manut sekadi patitis lan mamikukuh LPD;

c.       Niwakang tatimbang ring Prajuru LPD utawi pamutus babawos indik wyawahara ring LPD;

d.      Nitenin lan nureksain pemargin utsaha lan kauangan LPD;

e.       Nyobyahang kawentenan lan pemargi utsaha LPD majeng ring krama desa;

f.       Nguningayang indik panureksan (audit) LPD majeng ring paruman desa;

Pawos 9

Pengawas internal kagentosin utawi husan, malarapan antuk :

a.       Seda;

b.      Mapinunas ngeraga sangkaning rahayu saha polih lugraha saking prajuru desa;

c.       Sungkan rahat tur suwe saha tan presida ngamargiang swadarmaning pengawas internal;

d.      Tutug sengker pangadege;

e.       Husan dados Krama Desa Adat Presana;

f.       Sangkaning kahusanang antuk paruman desa, mabukti iwang turmaning melaksana  tan patut utawi lempas ring uger-uger LPD saha paswara Sang Angawa Rat.

Pawos 10

Pengawas internal wenang polih tuwas-tuwasan manut kawentenan kauangan LPD tur manut uger- uger sane kapastikayang sane kaunggahang ring Rencana Kerja lan Rencana Anggaran Belanja ( RK-RAPB) LPD;

Palet 2

Prajuru  lan Pengurus LPD

Pawos 11

1.      LPD Desa Adat Presana kaenter antuk prajuru sane kasudi antuk Paruman Prajuru Desa, inggih punika :

a.       Ketua;

b.      Tata Usaha;

c.       Bendahara;

2.      Prajuru pinilihin miwah kapastikayang malarapan paruman prajuru desa lan kakaryanang  SK Badan Pengawas lan SK Pengurus LPD olih Manggala Desa

3.      Napkala manut sakabuwatan ipun, Manggala Desa wenang nyudi prajuru LPD , tur salantur ipun katunasang tatimbang malarapan paruman prajuru desa;

4.      Ketua LPD dados ngangkat Karyawan dipetprade kakirangan tenaga, patut kakerSelat ring Paruman Desa, lan matatimbang antuk Manggala Desa lan Kakaryaning SK Karyawan antuk Ketua LPD.

Pawos 12

Ngadegang prajuru LPD majalaran antuk Surat Keputusan  Kelian Desa Pakraman  lan kahuningayang majeng ring Bupati lan Gubernur mawit saking Lembaga Pemberdayaan Lembaga Perkreditan Desa (LPLPD).

                                                    Pawos 13

Swadarmaning Prajuru LPD luwire:

a.       Ngarincikang program kerja lan kauwangan LPD nyabran awarsa, anggen nincapang pamargin LPD;

b.      Ngelaksanayang program kerja lan kauwangan LPD sane sampun kapikukuhang olih paruman prajuru desa mawit saking pengawas internal;

c.       Ngarincikang pidabdab- pidabdab pamargin LPD mangda praside manut ring pararem lan nginutin geguat Sang Angawa Rat;

d.      Nguningayang pamargin LPD nyabran asasih majeng ring Bupati, Gubernur mawit saking Lembaga Pemberdayaan Lembaga Perkreditan Desa ( LPLPD);

e.       Ngamargiang pisadok utawi pihuning sanunggil asasih ngenenin indik kawentenan jinah lan pamargin utsaha LPD majeng ring paruman desa;

Pawos 14

1.      Prajuru LPD wenang ngadegang lan nghusanang karyawan manut kabuwatan lan kawentenan

2.      Ngadegang karyawan LPD manut kadi kasurat kaping  (1) majalaran antuk Surat Keputusan Kepala LPD

3.      Ngadegang lan nghusanang karyawan olih Prajuru LPD risampune kacumponin olih pengawas internal

Pawos 15

Sane dados kahadegang Prajuru lan karyawan LPD luwire:

a.       Krama Desa sane munggah ring lekhitan banjar adat sajeroning Desa Adat Presana, turmaning jumenek magenah ring wawidangan Desa Desa Adat Presana;

b.      Madruwe ijasah sanistanya puput masekolah ring SMA tur kapineh nyandang dados Prajuru LPD;

c.       Mayusa sanistanya palekutus  (18) warsa utawi sampun nahen merabiyan ;

d.      Waras tur nenten sungkan – sungkanan;

e.       Satya ,teher tur madruwe rasa wirang ring LPD;

f.       Huning ring pamargin tata kelola kauwangan;

g.      Kayun kasumpah kalih manut ring sahananing pituduh prajuru desa pakraman;

Pawos 16

Prajuru lan Karyawan LPD kagentosin utawi husan, malarapan antuk :

a.       Seda;

b.      Mapinunas ngeraga sangkaning rahayu saha polih lugraha saking pengawas internal;

c.       Sungkan rahat tur suwe saha tan presida ngmargiang swadarmaning prajuru lan karyawan;

d.      Husan dados Krama Desa Adat Presana;

e.       Sangkaning kahusanang antuk paruman desa, mabukti iwang turmaning nenten nganutin awig- awig, uger – uger  LPD lan sahananing pituduh pengawas internal lan parajuru desa;

Pawos 17

1.      Sengker pangadeg Prajuru lan Karyawan LPD malarapan antuk evaluasi kinerja lan sertifikasi kompetensi

2.      Evaluasi kinerja manut  kasurat kaping (1) kalaksanayang nyabran awarsa olih pengawas internal kasarengin antuk Lembaga Pemberdayaan Lembaga Perkreditan Desa ( LPLPD)

3.      Malarapan antuk evaluasi kinerja, Prajuru lan karyawan LPD sane molihang kinerja becik wenang kasudi malih dados prajuru lan karyawan

4.      Sengker lan yusa pensiun prajuru Lembaga Perkreditan Desa (LPD) 56 warsa lan dados kapilih malih.

Pawos 18

1.      Prajuru lan karyawan wenang   polih tuwas-tuwasan manut kawentenan kauangan LPD tur manut uger- uger sane kapastikayang sane kaunggahang ring Rencana Kerja lan Rencana Anggaran Belanja ( RK-RAPB) LPD;

2.       Phalapeksaning  prajuru lan karyawan manut kasurat  kaping  ( 1 ) marupa:

a.       Gaji ;

b.      Tunjangan – tunjangan;

c.       Jasa Produksi lan

d.      Phalapeksaning tyosan sane patut (sah) ;

3.      Tunjangan – tunjangan manut kasurat palet (2) aksara b marupa Tunjangan Hari Raya, Tunjangan Kesehatan lan pesangon.

Pawos 19

Prajuru lan karyawan LPD sane kahusanang manut kasurat ring pawos 16 sajaba aksara e  wenang polih pasangon manut ring uger – uger Undang – Undang Ketenagakerjaan

SARGA V

 TABUNGAN, DEPOSITO LAN  KREDIT 

Palet 1

Indik Tabungan Lan Deposito

Pawos 20

LPD Desa Adat Presana, nerima tabungan saking krama  desa pakraman luwire Tabungan Sukarela, Deposito  lan simpenan tyosan sane manut antuk kawentenan maka dasar nincapang pikolih lan pamargin utsaha LPD

Pawos 21

Bunga Tabungan setunggil sasih polih bunga manut kewentenan pasar lan kawentenan LPD selanturnyane kaputus antuk pararem

Pawos 22

Bunga Deposito setunggil sasih polih bunga manut kewentenan pasar lan kawentenan  LPD selanturnyane kaputus antuk pararem

Pawos 23

Sane dados ngenahang jinah ( simpenan ) ring LPD Desa Adat Presana minakadi :

a.       Krama Desa Adat Presana;

b.      Krama tyosan sane nganutin daging uger – uger LPD Desa Adat Presana;

Palet 2

Indik Kredit

Pawos 24

LPD Desa Adat Presana, nguwehing jinah (kredit) ring krama Desa Adat Presana sane mabuat nyelang jinah utawi krama tyosan sane nyandang kapineh tur nganutin daging uger – uger LPD Desa Adat Presana, manut kawigunan ipun

Pawos 25

Pidabdab tata cara nyelang jinah ring LPD Desa Adat Presana inggih punika kadi ring sor:

a.       Sapa sire ugi pacang nyelang jinah, mangda madasar lekhite sane karauhang ring Prajuru LPD, saha mangda sapihuning Kelian Desa Pakraman  

b.      Risampune kapastika olih Prajuru LPD sang nyelang jinah mangda ngalingga tanganin lekhite pasobhaya sang nyelang sareng Prajuru LPD sane kaupasaksi olih Kelian Desa Pakraman

c.       Sang nyelang jinah mangda ngalingga tanganin lekhite pasobhaya,  nyihnayang raga pacang nginutin sahananing pasobhaya sane sampun kasungkemin. Lekhite inucap taler mangda kalingga tanganin olih sinalih tunggal kaluwarga pinaka saksi (penanggung) tur sumanggup nandangin hutang ipun ring LPD

Pawos 26

Swadarmaning krama sane nyelang jinah (debitur) ring LPD luwire :

a.       Nawur prabya administrasi sane kapastika olih Prajuru LPD

b.      Nawur prebya materai sane kapastika olih prajuru LPD

c.       Kredit setunggil sasih keni putran jinah (bunga) manut kewentenan pasar lan kawentenan  LPD selanturnyane kaputus antuk pararem

d.      Ngenahang tabungan wajib 2% (Kalih persen) saking flapon kredit ring LPD, saha salantur ipun mangda nabung sakasidan sanunggil ngasasih, ritatkala nawur angsuran pinaka Tabungan Sukarela rumasat pinaka gada – gada ring LPD;

SARGAH VI

UGER-UGER LAN PAMIDANDA

Pawos 27

Prajuru  LPD sane melaksana  tan patut utawi lempas ring uger-uger saha pasuara Sang Angawa Rat, jantos LPD pocol, wicara saha byuta keni pamidanda ngewaliang pepocolan inucap punika, saha tan lempas ring uger-uger Sang Angawa Rat (tuntutan pidana dan atau perdata).

Pawos 28

1.      Krama desa sane nyelang jinah ring LPD, mangdane nagingin saha nyukserahang lekhita pashobaya (formulir) sejangkep ipun, sane sampun polih linggga tangan saking Kelian Desa Adat Presana lan Kepala LPD

2.      Kredit sane kearsayang saking Rp 1.000.000,- (Siki Yuta rupiah) ngantos pinih akeh  20% (kalih dasa persen) saking modal LPD turmaning  patut kejangkepin antuk wala/kantah (jaminan) merupa arta berana sane mapangarga pinih alit atikelan ring akueh kredit punika, manut tetimbang Kelian Desa Pakraman lan Kepala LPD.

Pawos 29

1.      Krama Desa sane ngemolihang kredit ring LPD patut ngewaliang manut uger-uger LPD

2.      Linyok utawi lempas ring pasubaya kredit, krama desa sane nerima kredit keni pamidanda luire :

a.       Keni pamidanda nyabran sasih rikala wenten sane kasep nawur angsuran lintangan ring 15 (limolas) rahina angsuran jinah ring LPD selanturnyane kaputus antuk pararem

b.      Nyukserahang barang sane kaanggen wala/kantah (jaminan) kalaning sampun tutug dina palelangane, saha lascarya tur tan wenten sane miyalangin Prajuru LPD druwene ngamargiang palelangan;

c.       Kasepekang tan polih ladenan ring banjar, ring  desa pakraman ngantos utang ipun hinggas  ring LPD.

d.      Kanorayang utawi kaheladang saking Desa Adat Presana, saha tan lempas ring uger-uger Sang Angawa Rat (tuntutan pidana dan atau perdata).

3.      Pamidanda ring ajeng kelaksanayang olih perajuru Desa Adat Presana manut awig-awig Desa Adat Presana, saha tan lempas ring desa kala patra.

4.      Pamidanda ring ajeng masengker jantos kredit sane katerima saha panikel-nikel ipun hinggas  ring LPD, sajaba wicara tyosan sane katiwakang manut uger-uger Sang Angawa Rat(tuntutan pidana dan atau perdata).

Pasal 30

Pidabdab tata cara ngelaksanayang palelangan wala / kantah sang nyelang jinah yan tan satinut ring pasobhaya kredit:

a.       Mawates tigang (3) sasih saking sengker pasobhaya kredit (jatuh tempo)   sang sane nyelang jinah durung preside nginggasang  hutange ring LPD, tur sampun kabawosin ring PrajuruLPD  miwah Badan Pengawas Internal, kaglemekin ngantos ping tiga Prajuru LPD wenang ngelaksanayang palelangan.

b.      Pamargin ngalelang kalaksanayang  majeng ring krama desa.

c.       Hasil palelangan inucap kaanggen olih Prajuru LPD nginggasang hutange , saha yen wenten rangkung pacang kawaliang ring sang madruwe wala/kantah. Prade saking pamargin palelangane inucap durung kasidhan jangkep hinggas antuka nahur hutange, Prajurun LPD wenang malih ngalelang barang- barang sane hantes pacang lelang, kantos praside ginggas hutange ring LPD

Pawos 31

1.      Krama Desa sane ngemolihang kredit patut nahur hutange wantah ring Kantor LPD Desa Adat Presana manut pasobhaya, mangde nenten kantos karereh ka jero sowang – sowang

2.      Prade wenten sang nyelang jinah ring LPD Desa Adat Presana seda sadurung hinggas kredit utawi hutange ring LPD, hutang inucap kalanturang / katiwakin ring  sentana ( ahli waris)

SARGAH VII

PAHPAHAN PIKOLIH LEMBAGA PERKREDITAN DESA (LPD)

Pawos 32

Pikolih utawi keuntungan Lembaga Perkreditan Desa (LPD) sane sampun bersih nyabran penguntat warsa manut Peraturan Daerah Bali pah-pahan sekadi ring sor :

a.       Cadangan pokok utawi modal 60% (enam dasa persen).

b.      Dana Wewangunan Desa Pakraman 20% ( kalih dasa persen).

c.       Jasa Pruduksi 10% (dasa persen).

d.      Dana Pemberdayaan 5% (limang persen)

e.       Dana punia 5%  (limang persen)

SARGAH VIII

NGUWAH-NGUWUHIN PARAREM

Pawos 33

1.      Nguwah-nguwuhin pararem puniki kelaksanayang antuk paruman desa manut tata cara awig-awig Desa Adat Presana, melarapan antuk sagilik seguluk.

2.      Sakaluiring sane durung kabawos sajroning pararem puniki, patut kelaksanayang manut tata cara sane sampun memargi, kadulurin antuk pararem lan sima utawi dresta sane ketah.

SARGAH IX

PAMUPUT

Pawos 34

1.      Pararem puniki kawastanin Pararem Desa Adat Presana, indik Lembaga Perkreditan Desa (LPD).

2.      Pararem Desa Adat Presana puniki kamargiang ngawit kararemin, Anggara Kliwon Medangsia, tanggal 6 Januari 2015.

3.      Pararem puniki kalingga tanganin olih Kelian  Desa Adat Presana miwah Penyarikan

4.      Luwir sang ngalingga tanganin :

Kelian Desa Adat Presana I Made Sudiartawan

Penyarikan, I Made Suwarka

Berbagi :