Serba-Serbi Kepemangkuan Part #4

Pawiwahan tanggal 6 Januari 2014

 NIHAN GAGLERAN PEMANGKU NGAWALININ PAKALAN-KALAN PAWIWAHAN

  

Munggwing pemargin nyane pateh sekadi pemargin ngilenin upacara Dewa yajna utawi piodalan, karihinin antuk ngargha tirtha lan makarya tirtha pangresikane, tur raris kemargiang, sesampune puput ngemargiang pangresikane genahang dumun banten pangresikane punika, sampunanga margianga ring sang makalan-kalan pesakapan.

Dumugi raris dane mangku ngastawa Surya maka upasaksining yajna. Munggwing pengastawane pateh sekadi pengastawan Surya sane sampun kamenggahang ring ajeng (ring tuntunan Dewa Yajna ne).

Sesampune puput ngastawa ka Surya raris ngastawa Smara Ratih.

 

1.      SMARA RATIH STAWA:

OM Pradhana purusa sayoga ya,

Windu dewa bhoktra ya namah.

Dewa-dewi sayoga ya,

paramasiwa ya namah swaha.

OM Ananggah Kamini patni,

puspeso mandhani thata

Kamo Dhanawati patni,

Madani madana tahta

OM Manobhawa sobhani ca,

Sri mati makara dhwajah

Kandarpa Somawatis ca,

Sri Jayani ca manmatah

OM Kama Dewa Ratih patri,

Swetari smara ewa ca,

Atanur nandini patni,

manasi jas ca tarini.

OM Kamadewa ca tarini

OM OM Kamadewa ca Ratiye namah swaha.

 

2.      PAKELING SAHA SEHA :

OM Pukulun Sang Hyang Predhana purusa, makadi sira Sang Hyang Kamajaya Kamaratih, manusan nira handa sih waranugraha ri sira, Anembah angadakaken yajna pakalan-kalan nira sang bipraya wiwaha, ledang paduka Bhatara pada tumedun pada malinggih ring rwaning kukus arum.

OM Prenamya bhaskara dewam,

Sarwa klesa winasanam

Prenamya aditya Siwartam,

Bhuktu mukti wara pradam

OM Hrang Hring Sah Paramasiwa dewa lingga ya namah.

3.      NGATURAN TOYA :

Mawit saking toyane sane ring sangkune, siratang ke ajeng. Mantra :

OM Pang Padya ya namah

OM Ang Argha dwaya namah

OM Jeng Jihwa suddha ya namah

OM Cang Camani ya namah

OM Ghrim Siwa griwa ya namah

 

NGATURAN PASUCIAN:

OM Hyastu Dewa maha punyam Hyastu dewan ca, Hyastu sarwa to dewa-dewanam, Hyastu Dewa maha punyam.

 

NGATURAN SEKAR :

OM Puspantu Dewa astutyam, puspantu dewan ca, puspantu sarwa to dewanam, puspantu dewa maha punyam.

 

NGATURAN TIGASAN :

OM Tigastu Dewa maha punyam,

Tigastu dewan ca,

Tigastu sarwa To dewa-dewanam.

Tigastu dewa maha punyam.

 

NGATURAN TOYA :

OM Ang Brahma-amrta ya namah

OM Ung Wisnu-amrta ya namah

OM Mang Iswara-amrta ya namah

4.      ATUR PAKELING PAKALAN-KALAN :

OM Pakulun Sang Hyang Predhana Purusa, Sang Hyang Akasa, Sang Hyang Ibu Prthiwi, Sang Hyang Surya Candra Lintang Tranggan, mekadi sira Sang Hyang Triyo dasa Saksi.

Manusan nira handa sih waranugraha pukulun. Manusan nira anemu-aken jatu-karman ipun wet tinuduh den nira Hyang Kamajaya Kamaratih.

Maka tungtunging janma pada, hamangguhaken rasaning dumadi janma.

Manusan nira handa tirtha amrta, pangleburan, pangilanganing sarwa leteh, sebel kendel, malaning Kamajaya Kamaratih, mogha Bhatara asung nugraha. Enaking alaka rabhi, anutugaken kama ipun, ngawredyaken putra putu kulasantana, den amanggihaken kadirghayusa. Tan kahalangan tan kabancana, dening sarwa bhuta Kala Dengen, lawan sakriyopayaning wang hala. Apan sampun paduka Bhatara wus angadeg anyaksinin.

OM Siddhir astu tatas tu ya namah swaha.

 

 

5.      NGATURAN TATEBASAN BYAKALA/ PECARUAN:

OM Krura Raksasa rupan ca,

baibatsya yo caya punah

Sonya rupam awa-pnoti,

Twam wande waradam a-mum

OM Pukulun sang kala kali sedaya, sira reka pukulun angluwaraken sakwehing kala kali hana ring awak sariran ipun manusan nira. Puniki Pabyakalan ipun saking alaki rabhi katur ring sang Kala kali Sedaya, sira angluwaraken sakwehing Kala Kacarik, Kala Pati, Kala Kapekpek, Kala Kapengpeng, Kala Cangkingan, Kala Durbala-durbali, mwang Kala Brahma. Mwah sakwehing kala kalai hana ring awak sariran nira sang alaki rabhi. Wruh pwa sira Hyang Hyanging awak sariranya kajenengane den nira Sang Hyang Purusangkara, kasaksinin denira Sang Hyang Triyo dasa saksi, lah maruwatan ta sira, mundura ta sira sang kala kali maring awak sariran nira sang alaki rabhi. Tunggunen den bayu premana, anugtugaken tuwuh ipun amangguhaken rahayu dirghayusa.

OM Siddhir astu tatas tu astu ya namah swaha.

 

 

6.      NGANTEB ANTUK TRI BHUWANA :

OM Paramasiwa twam guhyam,

Siwa tattwa paroyanah

Siwa sya pranato nityam,

Candis ca ya namo'stute

OM Niwedhya Brahma Wisnus ca,

Sarwa bhotra Mahes-warah

Sarwa bhakti nala bhaktyam,

Sarwa karya prasiddhantam

OM Jayarti jaya ma-pnuyat,

Yasarti yasa ma-pnoti,

Siddhi sakala ma-pnuyat,

Paramasiwa ya labhatyam

OM nama Siwa ya namah swaha.

 

 

7.      NGANTEB PENGAMBIAN :

Maka sarana ngambe / mempersatukan premanan sang wiwaha.

Mantra :

OM Pukulun Sang Hyang Sapta Patala, Sang Hyang Sapta Dewata, Sang Hyang Wesrawana, Sang Hyang Premana, mekadi Sang Hyang Urip, sira amegehaken ri sthananira sowang-sowang, pakenaning hulun hangeweruha ri sira Handa raksanen den rahayu, haneda urip warasa dirghayusa sang nginambian.

OM prethiwi dewa sampurna, apah teja jiwatmanam, bayu akasa premanam, OM dirghayu jagat mretam.

 

 

8.      NGASTAWA SANG CATUR SANAK :

OM Pukulun kaki Siwagotra, Nini Siwagotra, sira angatag sanak-ira kabeh, maraga bhuta kala dengen makabehan makadi Sang Anggapati, Mrajapati, Bhanaspati, Bhanaspati-raja, Sang Korsika, Sang Gargha, Sang Metri, Sang Kursya, Sang Pretanjala, kon ametu kabeh pepareng lawan sanakira, alukat mapeningan, atepung tawar den rahayu.

 

 

9.      NGAYAB KALUHUR :

OM Bhuktyantu dewa maha punyam,

bhuktyantu dewan ca,

Bhuktyantu sarwa to dewa dewanam,

Bhuktyantu dewa maha punyam.

OM bhuktyantu Sri Lokanatha,

saganan sapari warah

sawarga sada siddhia ca.

OM Dewa bhoktya laksana ya namah

OM Dewa treptyantu laksana ya namah

OM Bhuktyantu sarwa banten ya namah swaha.

 

MANTRAN PERAS :

OM Ekawara, Dwiwara, Triwara, Caturwara Pancawara, purwa pras prasiddha siddhi rahayu.

 

10.  NGAYAB CARU :

OM Bhuktyantu Durga tangkaram,

bhuktyantu kala mewanca

Bhuktyantu Bhuta bhutanam,

bhutyantu pisaca sanggyam.

OM Ang Kang Khasolkaya swasthi swathi

kala bhuta predhana purusa

bhoktya namah swaha.

 

11.  Sesampune puput ngastawayang upacara pakalan-kalan ne patut dane mangku, ngilenin pangilen-ilen sang mekalan-kalan, inggih punika Kapertama kon ipun natab banten bayakaone.

Kaping kalih kon ipun natab Tatebasan Durmengala ne

Kaping tiga kon ipun natab Tatebasan Byakalane lan banten caru ne, ngastawa antuk pangastawan sekadi ring ajeng.

Kaping empat dane Mangku, ngalukat sang makalan-kalan sareng kalih punika, ngalukat antuk puja srawe, asta pungku, panglukatan penyudha malan. Taler sedurunge jaga pacang ngalukat, elingan pisan linggihang Kalan sang kalukat ring cangkem, atmanne ring Bhrumadhya, Dewan nyane ring Siwadwara.

Kaping lima, raris siratin tirtha prayascitta ne.

Kaping nem, margiang banten pangulapan ne ring

sang makalan-kalan sareng kalih, tur tatabin, dumugi siddha pepek bayu premanan sang wiwaha.

 

Sesampune puput pangilene sekadi ring ajeng, raris kon sang panganten ngaturan sembah. Dadudonan nyane

1.      Sembah Puyung

2.      Muspa ka Surya

3.      Muspa ring Ida Sang Hyang Smararatih, nganggen kawangen

4.      Muspa nganggen kawangen, maupasaksi, manut sekadi pakeling sane sampun kamenggabangring ajeng

5.      Mawali sembah puyung.

 

 

12.  MUNGGWING PANGILENE :

1.      Banten bayakaone ring cokor-cokor, ngicalang sekancan sane mayanin ring sajroning kauripane punika.

2.      Banten Tatebasan Durmanagala, margiang ring tengah-tengah utawi ring tangkah, maka unteng ngicalang sarwa drenggi mwah bendu krodhane ring angga.

3.      Natab banten Tatebasan Byakala, maka cihna mangdane sarwa bhuta kala sane ngarubeda ring sajroning angga Sarira ne prasiddha malaradan.

4.      Natab Banten Prayascitta, maka cihna mresihir angga lan kahyun dumugi sida suci galang apadang.

5.      Natab banten pangulapan ne, maka cihna ngulapin bayu premana mwang atma, dumugi siddha pepek sajroning angga Sarira.

 

 

13.  NATAB BANTEN RING PAKALAN-KALAN / PASAKAPAN :

Sesampune puput ngaturan sembah pangubhakti, tur sampun nuwur tirtha wangsuh pada ring Ida Bhatara. Raris lanturan sang makalan-kalan / wiwaha natab banten. Kapertama Sang laki / purusa kon ngambil keris sane magenah ring carang dapdape, sane istri / predana kon ngambil tikeh dadakan ne.

Pemargin nyane konen sang laki nusuk / nuwek tikeh dadakanne antuk kerise punika, maka cihna sang wiwaha sampun dados awor / atemu rasa sareng kalih, apan sang Kamajaya Kamaratih sampun kabersihin utawi kawisuddha.

Keris maka prelambang purusa, maraga Sang Hyang Akasa sebagai pengayom, sang lanang patut ngayomi kawentenan keluarga nyane, tur nguwehin kehidupan, kebahagiaan, kerahajengan ring sakeluarga nyane.

Tikeh dadakan, tikeh maka prelambang prethiwi / predhana utawi istri, sang meraga istri patut purun tur ledang natak tis panes ring keluarga, tur setate ngicenin pangan kinum ring keluarganyane,

Manut sekadi petapan prethiwi / tanah, ipun setate kesakitin, keencehin, mwah sane lianan, sakewala ipun tetep pageh ngicenin kauripan ring saisin jagate sami.

 

 

NATAB SESAYUT PAWARANGAN / SESAYUT PATEMON :

Sesayut pawarangan / patemon, sane matumpeng putih lan maulam ayam putih, maka prelambang Kama petak lambang purusa.

Sesayut pawarangan / sesayut patemon, sane matumpeng barak maulam biying, maka prelambang Kama Bang, lambang Predhana.

Punika raris ketatab, sane lanang natabin sane istri. Sane istri natabin sane lanang. Sesampune puput katatabin, raris ambil ajengan nyane sane wenten ring banten punika, sane istri ngambil sane barak, sane lanang ngambil sane putih, raris: saling sopin, maka cihna awor nyane kama bang lawan kama petak.

 

NATAB BANTEN SALAH UKUR :

Banten salah ukur punika, medaging ulam bebek lan ulam ayam mapanggang, sane lanang ngilut tenggek bebek, sane istri ngilut tenggek ayam raris siluran, tenggek bebeke genahang ring ayame, tenggek ayame genahang ring tenggek bebeke. Maka prelambang, sajroning ngemargiang kauripane punika mangdane nenten iwang panangkan, iwang sasulur, iwang antuk ngayunin.

Bebek maka prelambang kasucian, Ayam prelambang kreativitas / indriya. Bebek mahulu ayam maka prelambang ring sajroning kauripane, iraga patut setate eling ring ajah-ajahan agama tur setate ngelingang kasuciane ring sajroning Tri Kaya punika, taler nenten dados lali ring kawentenan tanggung jawab iraga ring kalanggengan / kebutuhan keluarga, mekadi istri, oka, lan wong tua / guru rupakene maka kalih.

Munggwing ayam mahulu bebek, maka prelambang, kreativitas atau prelambang indriya maka cihna / prelambang ring sajroning ngemargiang kauripane, dumugi nenten setata ngulurin kaindriyan kewanten, patut taler mangdane setate eling ring ajah-ajahan agamane, elingan sekancan sane wenten puniki wantah saking swecan Ida Sang Hyang Widhi. Mandane prasidha seimbang sekala kalawan niskala, ring sajroning kauripane punika.

 

NATAB BANTEN PEKALAN-KALAN

Ri kala natab banten pekalan-kalan / banten ayabane, maka cihna/prelambang nunas mangdane prasidha pepek bayu premaning sang mawiwaha.

Pengastawan nyane dados nganggen pengastawan pengambian, sekadi menggah ring ajeng.

Sesampune puput natab sekadi menggah ring ajeng, raris kon sang mawiwaha mangda ngadeg, sane istri nyuwun sok gede, sane lanang negen tebu lan eedan nyane, maka prelambang ring sajroning sampun grehasta-asrama/mapikuren. Patut sampun mandiri, uning mautsaha, nenten malih ketergantungan ring wong siosan / guru rupaka ne.

Yan sampun mapikuren janten sampun tanggung jawab ring pemargin adat lan agama ring pakraman, menyama braya.

Sesampune sregep sami kabakta, raris sang penganten kon maileh ke tengen / kekanan ping tiga, saha nanjung sambuk lan megatin benang tur maubek-ubekan, kariyin atuk apine ring ajeng, maka simbul sasuluh rikala ngemargiang ka uripane puniki, tur janten sampun makweh pacang kepanggih gagodan-gagodane, utawi hambatan. hambatan.

Sapunika munggwing make unteng sajroning upacara pawiwahan ne, manut kawentenan bebanten / upakara nyane.

Berbagi :