Contoh Naskah MC Berbahasa Bali untuk Pengukuhan Prajuru Anyar

 

Inggih ratu Ida Dane sinareng sami, titiang nunas uratiannyane duaning acara jagi pacang kekawitang.

Mungguin dudonan acara rahina sane mangkin inggih punika:

1.     Pamurwakaning atur, sakeng titiang

2.     Pengewacen Puja Pengastuti

3.     Atur Panyambrama sakeng penglingsir Banjar Adat Catur Warga Desa Adat Sebudi

4.     Sambrama wacana sakeng Saba Desa Adat Sebudi

5.     Sambrama wacana sakeng bapak Kepala Wilayah Banjar Dinas Sebudi

6.     Sambrama wacana sakeng sinalih tunggil penglingsir Banjar Adat sane wenten ring Wewidangan Desa Adat Sebudi

7.     Sambrama wacana sakeng Bendesa Adat Sebudi

8.     Mikukuhang prajuru Banjar Adat Catur Warga Desa Adat Sebudi

9.     Penyineb

(Acara Kaping…)

Ratu Ida Dane sareng sami sane dahat wangiang titiang, sedurung acara puniki jagi kekawitin / titiang rasa angayu bagia pisan majeng ring Ida Sang Hyang Widhi Wasa / duaning sangkaning ida iraga sami kenak rahayu lan prasida mapupul ring genahe iriki, nemonin rahina Buda Kliwon / Wara Ugu pinanggal tigang dasa Desember / kalih tali kalih dasa, jagi ngemargiang acara / Mikukuhang Prajuru Banjar Adat Catur Warga / Desa Adat Sebudi / warsa kalih tali selikur ngantos kalih tali nemlikur. Inggian punika ngiring dulurin antuk ngaturang puja pengastungkara / malarapan nguncarang panganjali.

Om Swastyastu

 

 

Sane dahat Singgihang titiang, Bendesa Adat Sebudi lan prajuru sareng sami

Sane wangiang titiang, Saba Desa Adat Sebudi

Sane kusumayang titiang, penglingsir Banjar Adat Eka Darma Kerti lan Banjar Adat Taman Bagendra Desa Adat Sebudi

Sane Werdiang titiang, Penglingsir Dadya Desa Adat Sebudi

Sane Manggehang titiang, Bapak Kepala wilayah Banjar Dinas Sebudi

Sane Suciang titiang, Paiketan Pemangku Desa Adat Sebudi

Sane Utamayang titiang, Penglingsir Banjar Adat Catur Warga Desa Adat Sebudi

Taler krama sareng sami, sane tan sida nyacak siki-kalih / sane dahat tresna sihin titiang

 

Ratu Ida Dane sareng sami, parikrama kaping 2 jagi kelanturang antuk puja pengastuti. Inggian punika, Ida Dane Sareng Sami titiang tunas mangda ngadeg Padaasana. Inggih sane ngamongin durusang. Inggih Ida Dane sareng sami durusang malinggih mewali.

Acara jagi kelanturang malih antuk acara kaping 3, inggih punika atur panyambrama / sakeng penglingsir Banjar Adat Catur Warga Desa Adat Sebudi. Inggian galah durusang. Inggih matur suksma antuk panyambrahma punika.

Acara selanturnyane sane kaping 4, inggih punika sambrama wacana sakeng Saba Desa Adat Sebudi. Inggian galah durusang. Inggih matur suksma antuk sambrama wacana punika.

Acara selanturnyane sane kaping 5, inggih punika sambrama wacana sakeng Bapak Kepala Wilayah Banjar Dinas Sebudi. Inggian galah durusang. Inggih matur suksma antuk sambrama wacana punika.

Acara selanturnyane sane kaping 6, inggih punika sambrama wacana sakeng  sinalih tunggil penglingsir Banjar Adat / sane wenten ring wewidangan Desa Adat Sebudi. Inggian galah durusang. (Titiang sudi penglingsir Banjar Adat Eka Darma Kerti, inggian galah durusang.) Inggih matur suksma antuk sambrama wacana punika.

 

Acara selanturnyane sane kaping 7, inggih punika sambrama wacana sakeng  Bendesa Adat Sebudi, sepisanan lungsurin titiang jagi pacang / Mikukuhang Prajuru Banjar Adat Catur Warga / Desa Adat Sebudi . Inggian galah durusang.

Prajuru sane sampun kasudi durusang ngerereh genah ring ajeng.

Inggih suksma aturang titiang majeng ring Jro Bendesa, duaning sampun prasida mikukuhang lan ngicenin panugrahan majeng ring Prajuru Banjar Adat Catur Warga sane anyar, dumogi melarapan antuk acara puniki / prasida ngemargiang suadarmaning agama lan Negara, manut patitis daging agama Mokshatam Jagadhita Ya Cha Iti Dharma.

Titiang nunas mangda ledang, jenek abosbos jadi ngerereh dokumentasi.

Inggih wantah sampun puput, durusang malinggih ring genah soang – soang.

 

Acara selanturnyane, galah aturang titiang majeng ring Penglingsir Pajuru Banjar Adat Catur Warga sane anyar, mangde prasida matur amatra majeng ring Ida Dane sareng sami. Antuk galah durusang. Suksma aturang titiang majeng ring penglingsir Banjar Adat Catur Warga sane anyar.

Inggih ratu ida dane sareng sami sane banget suksmayang titiang, pemekas para pemilet sareng sami / titiang ngaturang suksmaning manah antuk keledangan nyane ring sajeroning ngemargiang parikrama / Mikukuhang Prajuru Banjar Adat Catur Warga / Desa Adat Sebudi sane anyar sampun prasida memargi antar. Mejanten pisan sampun risajeroning titiang mapengiring ngenterang parikrama puniki, kirang langkung antuk titiang ngaturang sangkaning kaya, wak, manah titiang tambet /  lugrayang titiang nunas agung rena pengampura. Pinaka wusananing atur titiang ngaturang parama shanti.

Om Shanti Shanti Shanti Om

Duaning sampun puput parikrama puniki, antuk galah titiang waliang majeng ring penglingsir Banjar Adat Catur Warga.

Berbagi :