Gaguritan Sang Cangak
SINOM
PAMURWANING ATUR TITIANG
RING IDA HYANG SARASWATI
PINAKA SARINING TATWA
MANGDA IDA NGALEDANGIN
SAHA ASUNG NGANUGRAHIN
NGICEN NE KABAWOS WERUH
LAMAKANING TITIANG SIDA
MAMUPUTANG NE KAGURIT
ANGGEN ATUR
RIKALANING PASANTIAN
KAWITANG PUNANG CARITA
NE KANGGEN MURDANING GENDING
SATWANNYA I SANG CANGAK
TITIANG SAKING NUNAS YUKTI
GUMANTI WANTAH MANYALIN
DENING SATWA SAMPUN PUPUT
KAWITNYA BAPANE NYATWA
RING PYANAKE KANTUN ALIT
MAPATUTUR
BAPANNYA RARIS MANGUCAP
GINADA
BAPA JANI MANUTURANG
APANG JUA CENING MIRAGI
SATWANNYA I SANG CANGAK
NGEKA DAYA MAPI SADU
MOMONE KAENGKEBANG
GAMPIL KATAKIL
APANG SIDA MIKOLIHANG
NGAWIT BAPA MANUTURANG
I CANGAK SEDEK MINEHIN
KENKEN JANI BAN MADAYA
BENE APANG BAKAT EJUK
DI TLAGANE APANG TELAH
SEKA BEDIK
SADINA AWAKE NGAMAH
MELAH JANI UPAYAANG
JANI NGAMAH MALU TUNAIN
NGALIH DI TONGOSE LENAN
BENE APANG TUSING TAHU
ALUSIN YA EBOHANG
SEKA BEDIK
MUSTI YA SAYAN TABAH
YAN SUBA EBOH MAKEJANG
GAMPANG LAKAR BAN NGEJUKIN
PEPED YA SEKA BESIKANG
KEBERANG JOHANG MUNDUT
DITU MARA YA KATADAH
KENYAR-KENYIR
I CANGAK PRAGAT NGEKA DAYA
CRITA SUBA PASEMENGAN
DI TLAGANE ANE ASRI
MARING TENGAHING ALAS
KAPAYASIN BUNGAN TUNJUNG
YEH NYANE DALEM PESAN
TURIN ENING
LIYU BENE MAULEHAN
MAJUJUK DITU I CANGAK
BATIS NENGKLENG SEMU RIMRIM
MAPANGANGGO SARWA PETAK
MAGUNITRI LAN MAKETU
MANTING-ANTING MASULEMPANG
CARA SUCI
MIRIP KADI SANG BAGAWAN
TUSING TAEN NGUTANG SEMENGAN
SANG BAKA SUBA MANINGKRIK
MAJUJUK SAI DI TENGAH
NANGING YA SING TAEN NGANTUG
PAESNYANE KAGELEKANG
NGWALEK DI HATI
NAH ANTIANG BIN AKESEPAN
SINOM
AKUDANG DINA KAPWA I CANGAK
NYALANANG DAYANE CULIG
MABET-ABET TWARA MANGSA
YADIN ADA MANGUYAKIN
BENE SUBA SAYAN BANI
MAPUNDUH YA NGARUBUNG
ADA BANI MANATASANG
MATUR YA MANUNAS SISIP
AKSAMA RATU
TITIANG MANGKIN MANUNASANG
TITIANG DAHAT ANGOB PISAN
DADOS WUSAN MAMATI-MATI
MAMANGSA SAKANCAN TITIANG
SANG BAKA KENYUNG NYAWURIN
YAN ENTO TUNASANG CENING
NAH KONYANGAN MALU NGUMPUL
APANG ONYA MADINGEHANG
CRITAN BAPA ANE NGUNI
SAKING TUHU
JANI BAPA MANUTURANG
MALU BAPA SAKIT KERAS
DASDASAN BAPA MATI
NGARENGKEKAN KAAH-KAAH
ANGKIHANE NU ABEDIK
GANTIN BAPA NU MAURIP
BATHARA ASUNG MANULUNG
MASABDA SAKING MANTARA
MAPICA UBAD DAHAT SINGID
APANG SUUD
BAPA NYALANANG HIMSA KARMA
DISUBANE BAPA NGIRINGANG
BAPA SEGER PRAMANGKIN
TANPA BOREH TANPA UBAD
DISUBANE SEGER JANI
BAPA BUIN KANDIKAIN
MAPRAYASCITA MAPUPUG
MAWINTEN TERUS MADIKSA
NGANUT SASANA SUCI
DADI WIKU
NYALANANG AJI KADARMAN
BAPA TUSING BANI TULAH
TEKEN PAWISIK SANG HYANG WIDHI
JANI SUBA BAPA NYALANANG
DADI PEDANDA MRAGA SUCI
SUUD MAMANGSA MAMATI-MATI
DOSAN BAPA ANE MALU
TEBUS BAPA APANG TELAH
ADA TAKUT CENING JANI
MAI MAPUNDUH
NGAJAK BAPA MAPAENEMAN
SANG BAKA KENYEM DI MANAH
REH DAYANE MANGAMBAHIN
BENE TUSING ADA RENGAS
PADA MELED MANESEKIN
I CANGAK MANYAMBANGIN
PRAJANI MASEH SEMU
MAMUNYI NGARAD MEGAT-MEGAT
UDUH PANAK BAPA CENING
TWARA BUUNG
CENING ENGGAL KAUSAKANG
SEDIH BAPA TANPAINGAN
REH LEKETE TEKEN CENING
BAPA SUBA PEDAS PESAN
ORTANE SUBA PASTI
MANEGA PENCAR LAN JARING
TUKANG SUSUG LAN SAWU
LAKAR TEKA MANGUBEKIN
DI SASIH KAPATE JANI
TWARA BUUNG
CENING ONYO KABAKATANG
PANGKUR
PEGAT MUNYINE NUTURANG
LAUT MULISAH, I CANGAK YA MANGELING
RUPA KANGEN YA ANULUT
SAHA NGAME-AME BATARA
DUH PAKULUN, TODAY TITIANG I TUA GUDGUD
NIRGUNA YADNYAN TITIANG
TAN SIDA ANTUK NULUNGIN
BENE PADA MAKESIAB
KATAKUTAN, NINGEH WACANAN SANG RESI
ADA NGAREPANG UMATUR
AMPURA PADUKA PRANDA
DONG TULUNGIN URIPANG SISYAN I RATU
SAKANCAN WATEK IWAK
LEDANG MAPAICA URIP
SANG BAKA MACENGEHAN
TUR SINAMBI, NYUSUT TOYAN PANYINGAKE
MAMUNYI NGARERES ALUS
MECIK ALIS CARA NGENEHANG
ADUH CENING, BAPA INGET CENING BAGUS
ADA TLAGA MELAH PESAN
APIT GUNUNG LIWAT SINGID
BUINA DANU ENTO LINGGAH
YEHNE DALEM, TUR ENING TAN KADI-KADI
KENEH BAPA YAN SAPATUT
JALAN KEMA CENING MAKEJANG
SEKA BEDIK, BAPA NYIDAYANG MANULUNG
ADINA BAPA NGEBERANG
SINAH TAN KABAYA PATI
PRAGAT I CANGAK NUTURANG
KAKALAHIN, BENE APANG NGITUNGIN
MANI SEMENG APANG CUMPU
KETO PABESEN I CANGAK
DADI GATI, BENE SANGKEP SAPAUT
TUSING TAHU TEKEN NAYA
I LUBAK MABULU PITIK
TWAH AUKUD ANE TULAK
I YUYU, DAHAT SIKSA MARING ATI
AKETELAN TWARA NGUGU
TEKEN SOLAHNE I CANGAK
DIJA UNDUK, I BUAYA TWARA NYANGU
PULES-PULESAN NGAE AKAL
APANG BANI NGEMAEKIN
CRITA BIN MANI SEMENGAN
WATEK BENE, MAJEJER PADA MANGANTI
APANG YA PALING MALU
KAKISIDANG BAN I CANGAK
MELED NGALIH, APANG ENU KUNGGUAN IDUP
I UDANG LAN I NYALIAN
TELAH KAMAH MAKASAMI
I YUYU DADI PANELAH
SUBA NONGOS DI TEPIN TLAGA MANGANTI
SANG CANGAK TEKA SAMPUN
I YUYU MATUR NGAREPANG
INGGIH RATU, TITIANG NUNAS MANGDA GISU
GELIS TITIANG KAKISIDANG
MANGDA NENTEN TYANG KASEPIN
GINADA
I CANGAK YA SADA RUNTAG
PADE KATARA ANE JANI
TUSING BUUNG KAL SANGKALA
I YUYU NGAREPANG NYUJUH
BAWONGNYANE KAGISIANG
ANTUK KAPIT
TUR UMATUR APANG ENGGAL
TWARA DADI TANGGEHANG
I YUYU APANG KENGGALIN
I CANGAK ALON NGEBERANG
I YUYU DITU MAGANTUNG
DI BAONGNYA YA I CANGAK
KAGET GELIS
TEKED DI BATUNE ASAH
I YUYU MAMEDASANG
TULANGNE MADUGDUG MAMUTIH
NANGING YA SUBA SEDIA
JANI BUKTINE KATEMU
KAPITNE KAAKESANG
TUR MAMUNYI
IBA CANGAK NAH ORAHANG
BUIN KAPITNE KAKESANG
TUR MATBAT MANGANCAM MATI
TEBUS DOSAN CAINE CANGAK
URIP IBANE KAL CABUT
DOSAN IBANE KALIWAT
JANI RASANIN
PEGAT BAONG CAINE CANGAK
DANGDANG
NAH NE JANI, BAPA LAKAR BUIN
MANUTUGANG
SATUANNYA I CANGAK
BAGUSANG CENING MIRENGIN
SATUAN BAPANE NGACUH
NGANDANG NGANJUH TANPA INDIK
MADASAR BAN KENEH SAYANG
KRANA BAPA MULA LACUR
TWAH MABANTANG MANAH TINDIH
SAYANG PYANAK
MANAHE SETATA GILIK
MADAK SIDA MANGGIH MELAH
KRANA KETO, IDUPE DINI CENING
TWAH AJAHAN
DI JAGAT SEKALA
BEKELE TWAH KAKALIH
SUKA DUKA MATI IDUP
SUGIH TIWAS BENEH PELIH
SING NYIDAYANG NGIMPASANG
NE ULATI JALAN TUWUT
LAKSANANE ANE APIK
APANG BEDIKAN
DOSA CORAH BAKAT SANGKIL
SINAH BERAT RIWEKASAN
GINADA
I CANGAK SLEGAK-SLEGAK
NGACUH YA MANGIDIH URIP
PELIH ICANG SAJA PESAN
KWALA ICANG NGIDIH IDUP
APA CAI KAKENEHANG
KAL AYAHIN
BUIN SAIDUPAN MAMANJAK
I YUYU YA MANIMBAL
EDA LIYU CAI MAMUNYI
ABA KAI MALIPETAN
DI TONGOS KAINE MALU
YAN CAI TWARA NYAK
DINI MATI
BASANG KAI GAREGETAN
I CANGAK SING NYIDAYANG NGUDA
URIPNE SUBA KAGISI
KUDIANG BAN MANYELSELANG
MALIPETAN BAYUNE SUWUNG
I YUYU TETEP SEDIA
STATA NYEPIT
BAONG NYANE YA I CANGAK
ENGGAL JANI CARITAYANG
I YUYU TEKED JANI
DI TONGOSE ANE PIDAN
DIMARANE MENCEGAN TUWUN
KAPIT NYANE KAAKESANG
SAMBIL MAMUNYI
NGUMAN-UMAN YA I CANGAK
JANI KAI MANUTUGANG
MUNYIN KAI ANE TUNI
CAI TUWI MADASAR CORAH
SATATA MADAYA APUS
PANTES CAI MAAN HUKUMAN
BANGKA CAI
ANGGON PAMAYAHAN DOSA
DANGDANG
YA I CANGAK, JANI NGETOR NGILGIL
KATAKUTAN YEH MATANE MEGAT
MUNYI NGETOR NGIDIH URIP
TULUNG ICANG APANG IDUP
ICANG SADIA MAMANJAKIN
SATUWUH ICANGE NGAYAH
KARAYANING PANAK CUCU
TO MAKEJANG SUKSERAHIN
KUASAYANG SAKITA CAI NGUDUHIN
KODAGANG TO NGAMANJAKANG
YA I CANGAK, MARASA TEKEN PELIH
BAS NGALIWAT
BAS NGULURIN MANAH
NYALANANG DAYANE PENGIT
NAGIH MOTAH ULIHAN ALUH
NGITUNGANG DEWEK PADIDI
ENGSAP TEKEN MANI PUAN
LOBAN KENEH BAKAT TUWUT
KUDIANG JANI NGAMALIKIN
KADUNG LEWAT
ULI JANI ICANG NYUMUNIN
MASOLAH ANE MADAN MELAH
GINADA
SUBA CAI KAAH-KAAH
NAGIH BANGKA KELIK-KELIK
NU MASIH CAI CORAH
NAGIH NOMBOK APANG IDUP
YAN SUBA CAI ELAH
PASTI BUIN
NGULAH ALUH APANG MOTAH
SAJABA CAI BANGKAANG
TANPA GUNA NU MAURIP
SAIDUPAN NGAE CARA
NE KARMAN CAINE PUPU
ALA AYU MULA MABUAH
TUR KAKAPIT
PEGAT BAONGNE I CANGAK
SINOM
DISUBANE I CANGAK PEJAH
ATMANNYANE MALESAT GELIS
MANYUJUR SUNYA LOKA
KARMA PALANE NGATEHIN
PAREK RING HYANG YAMADIPATI
NE MICAYANG DANDA SAPAUT
TEKEN SOLAHNE DI LEMAH
SOLAH ALA LAWAN BECIK
MAPAN DITU
PAMUPULAN JELE MELAH
ATMAN UDANG LAN NYALIAN
ADA GIRANG MAMAPAGIN
ATMAN NYANE I SANG CANGAK
PARAYA LAKAR MANYAKITIN
NGAWALESANG DUKA URIP
JANI ADA JALAN LUUNG
APANG JANI MAAN TANDINGAN
CARA BIKAS NU MAURIP
PADA UMIUNG
NANDAN ATMANE I CANGAK
I CANGAK KESIAB NGAJINANG
KIMUDE TAN SIPI-SIPI
INGET TEKEN LAKSANA CORAH
I NYALIAN ENGGAL NYAPATIN
JERO MANGKU WAWU PRAPTI
NAPI MAHAWINAN NUTUG
SISIAN MANGKUNE SAMI MENDAK
NGUDA MANGKU DADI SINTRIG
TANPA KETU
BAJRANE DIJA MAKUTANG
BENYAH KENEHNE I CANGAK
KIMUDE TAN KADI-KADI
ALUS MUNYINE I NYALIAN
BUKA BORBOR MAMANESIN
I CANGAK KOLOK MANEGIL
I NYALIAN BUIN NGALANTUR
KENYIR MANIS SADA BANBAN
NAPI KARYA MANGU MRIKI
DIJA MUPUT
NAPI WENTEN SANG MAYADNYA
ADUH BAPA LACUR PESAN
I YUYU ANE NYAKITIN
BAONG BAPANE PEGAT
NEBUS DOSAN BAPANE NGUNI
NAH NE JANI BAPA ATEHIN
NGALIH TONGOS ANE LUWUNG
ANE MAADAN SAWRGA
I NYALIAN KENYUNG NYAWUTIN
MAI NUTUG
I CANGAK JANI MAENGEHAN
NAH LAUTANG MAJALAN
JALAN NGALIH TONGOS LUIH
BUAYANE SUBA NGANTOSANG
ENTO NE LAKAR TEGAKIN
I CANGAK TERUS LUMARIS
SAGET BUAYA NE KATEPUK
NYEBAK BUNGUTNYANE LINGGAH
GIGI RANGAP TUR MARINGGIT
LAUT NGELUR
I CANGAK YA KABABANG
MALAIB BAH NYELEGADAG
I NYALIAN MANYAGJAGIN
EDA MANGKA SUMANGSAYA
JALAN BARENG MANINDIHIN
KAJEMAK LAUT KADANDANIN
LANTAS BARENG YA LUMAKU
TEKED DI TEPIN TOYA
I NYALIAN MUNYINE MANIS
BECIK SAMPUN
NE TUNDUN TIANGE GISIANG
DANGDANG
DARMA ARTA, MUANG KARMA MALIH
YAN TUWEKANG
IDUPE PANG ANTAR
APANG TEKEK CENING NGISI
ENTO MAKEJANG TUI PATUT
NANGING BESIK DA NGENGSAPIN
DARMANE KANGGON DASAR
ANE DADUA SINAH LUWUNG
REH MADASAR ANTUK BECIK
SINAH PISAN
YASAN IDUPE KAPANGGIH
REH TAN NGALALIANG DARMA
KARMA ARTA, LAKAR DADI WISYA
MANGARUSAK
NGAWE KAPETENGAN
NGAWE ENGSAP RING KADANG WARGI
NGARDI OBAH TWARA NYIKU
REH DARMANE KAENGSAPIN
TUAH MELED MIKOLIHANG
ENTO KRANA PARA LALUHUR
MASADANA TUTUR UTAMI
NGALAWATANG
KUPASAMANE DI GUMI
ADARMANE APANG PUNAH
SINOM
SUKSMA BAPA RING MANAH
WIREH CENING JEMET MIRAGI
JANI BAPA BUIN NUTUGANG
PIDAN YA I CANGAK CULIG
SINAH MALAWAT BAN CENING
BUAH KARMANE KAPUPU
ALA AYU MULA MABUAH
SANG BAKA MANGALAP JANI
SINAH NUTUG
MANGATEH KA DASAR KAWAH
DI TUKAD SERAYU YA NGALIWAT
UDANG NYALIAN MAMAPAGIN
JURU PATUJUHIN JALAN
I CANGAK BINGUNG PALING
LIU TEPUK TAWAH NAKUTIN
MASA TEKEN DEWEKE MALU
ENGGAL BAPA NYARITAYANG
DI TEGAL PENANGSARAN PRAPTI
LIU TEPUK
ATMANE KABAYANG-BAYANG
I CANGAK JEJEH MERENGANG
MASA TEKEN KACELIH-CELIH
NAREDES YA MANAKONANG
SANGKAL BAPA AJAK MAI
BAPA TAKUT MANGIWASIN
KATIGTIG MUAH KAGANTUNG
APA DOSANE DI LEMAH
ADA ANE UBER API
PASELEGUK
PAJERIT MANGALAD-ALAD
ENTO BUIN AJINANG BAPA
NE KAOROS KABUNGSANG-BANGSING
KATITIG KABAYANG-BAYANG
KAPECIK KANTI NGAJENGIT
ADA NE KAJARAG CICING
ADA NE KAENDER KAUNG
ADA MANYONYOIN BEJAL
JERING BULUN BAPA CENING
BAPA TAKUT
EJOHANG CENING ENGKEBANG BAPA
DANGDANG
I NYALIAN, SADA EGAR TUR MAKENYING
MANERANGANG
APANG CAI NAWANG
SANG HYANG YAMA DIPATI
TUSING DADI DUEGIN NUTUR
JURU RAOS PIN MELANIN
YADIN SUNDUL PIPIS EMAS
SING NYIDAYANG LAKAR BUWUNG
YAN SOLAHNE MULA PELIH
SUBA SINAH
DINI JANI MAAN PIKOLIH
TEKEN KARMANE NEPLEK PESAN
YA I CANGAK, GOBANE SAYAN GRIGIS
KAJEJEHAN
NGALAWANIN NGUCAP
SANGKAN KETO CENING JANI
SAPALAN CENING MANULUNG
ENGGALANG AJAK MAKISID
BAYUN BAPA JEJEH PESAN
TANGKAH BAPA NE NGARUDUG
PANG SING BAAT ICANG NEPUKIN
NAH AKALANG
ORAHANG BAPA ATMA SUCI
TUMITIS LAKAR MAMANJAK
IH CANGAK, DADI PONGAH TUI CAI
NE MAPETA
TAN NGRASA KEN AWAK
I NYALIAN NGAWALEKIN
NAH MAI ICANG TUTUG
ICANG SANGET MADALEM CAI
ENTO ADA TONGOS MELAH
TEKEN BIKAS APANG ANUT
PANTES KAWAH BAKAT CAI
NGLEBUR CORAH
DITU JUA CAI TONGOSIN
CAI DADI DASAR KAWAH
ENU BENGONG, YA I CANGAK JANI
KAMEMEGAN
BAONGNE KAJEMAK
I CANGAK KAERED JANI
BE LAN UDANG PADA MILU
BARENG NGERED NGWALEK BUIN
IH IBA BAKA CORAH
KADIEN CAI DINI PATUH
BUKA DITU DI SEKALA GUMI
DADI ILIDANG
DADI TURUBIN BAN PIPIS
YADIN DUEGE MANGAKAL
GINADA
I CANGAK MABRIYUG EBAH
AWAK NGETOR SAMBIL NGELING
TAKUTNE SAYAN NYANGETANG
NGAJINANG ATMANE LIU
KASAKITIN KABAYANG-BAYANG
PADA NYERIT
NGERES BASANG NE I CANGAK
I NYALIAN BUIN MANGUCAP
EH ENTO BUIN IWASIN
ENTO ADA KABAYANG-BAYANG
BUIN KEJEP KAL KACEMPLUNG
BUAT DADI DASAR KAWAH
TEKANING CAI
BUAH CORAHE DI LEMAH
DI LEMAH NYIDAYANG ELAH
DANDANE NYIDANG SAMPINGIN
WIREH DUEG MANYARUANG
KANTINE ANGGO PAKUKUH
DADI BENEH ANE SALAH
BISA KALIS
YADIN SENGKE NE RAOSANG
JANI PALANE BUKTIANG
WIREH DEWEKE MAKARDI
BUKA CAI CANGAK CORAH
EDA CAI LIUNAN TUTUR
YADIN ABENANG PING SATAK
MASIH CAI
LAKAR DADI DASAR KAWAH
NAH INGETANG CAI CANGAK
ICANG TWARA MADAYA BEGIG
TWAH CAI NGARDI JALARAN
ICANG MABESEN JANI MALU
YAN SAGET BUIN PIDAN
CAI NUMITIS
KUTANG ABET CAINE SUBA
ASTA KOSALA NYINAHANG
SIKUTANG DI AWAK CAI
YAN CAI MADEWEK LANTANG
EDA BAWAK CAI NGAKU
APA BUIN MADEWEK TIWAS
DA NGAKU SUGIH
TEKEN UKUDANE SIKUTANG
ICANG JANI KAL NGATURANG
RING IDA SANG JOGOR MANIK
KAPATUTANE MANGGEHANG
TEKEN CAI CANGAK BEGUG
I BAKA MABRIYUG EBAH
NYELE ATI
KAPAID KA SISIN KAWAH
I CANGAK SING BANI KEDAT
HYANG JOGOR MANIK MANAMPI
UDANG NYALIAN PAMIT TUR NYEMBAH
I CANGAK KESIAB NGARUGUH
KENKEN JANI BAN NGENGKEBANG
SAGET NYERIT
HYANG JOGOR MANIK MANGERAK
AH-AH-IH-IH IBA CANGAK
MAI IBA DESEKIN KAI
BIKAS CAINE SUBA TAWANG
IBA DEMEN MADAYA APUS
MAPI SADU NANGING CORAH
ASANIN JANI
PASTI CAI LAKAR MAYAH
SINOM
TAN MABUAT BAPA NERANGANG
PIDANDAN I CANGAK CENING
KALEBOK DI DASAR KAWAH
AMONTO BAPA NYRITAIN
MADAK MAPITUAS KIDIK
NE JANI PUNGGELIN MALU
DUHKITA ADA DI AWAK
IRAGA PATUT NYUKSEMAIN
DAHAT WERUH
PARA LINGSIRE IPIDAN
MATUTUR BAN CARITA
ANTUK PUPUH MUAH GENDING
ENTO CENING LAN RESEPANG
ANGGON SUNDIH SAI-SAI
MAJALAN SALANTANG MARGI
BAPA TUAH MAPAWUNGU
MADAK CENING SIDA NAMPA
NGUKUHAN SASTRA AGAMI
MADAK NULUS
CENING SIDA MIKOLIHANG
PUPUT BAPA MANYATWAYANG
SATWANE I CANGAK CULIG
SATWA BAN BAPA NUNAS
RING PUSTAKA DANDAKA TANTRI
AKSAMAYANG BAPA CENING
BAPA TAN UNING RING PUPUH
PADA LINGSA KATAH IWANG
BASA KRUNA KATAH SISIP
INGGIH DURUS
RAHAYANG SAKEJOK LINTANG
PAMUPUT – GINADA
AMUNIKA ATUR TITIANG
DENING GALAH SAMPUN WENGI
NGIRING MANGKIN JUA CANDEGANG
MANGAYAH NGATURANG KIDUNG
MOGI LEDANG IDA NODYA
TUR MANGAKSI
YASTUN NISTA AYAH TITIANG
Posting Komentar untuk "Gaguritan Sang Cangak"