Gaguritan Sudhamala
GAGURITAN
SUDHAMALA
SEKAA SANTHI
BEBRANANGAN
PUPUH GINADA
SWASTYASTU ATUR TITIANG
RING SANG NANGUN KARYA IRIKI
SUKSMA ATURANG TITIANG
KADI PURUN SAMATRA MATUR
GUMANTI NYARENGIN MAYADNYA
SANE MANGKIN
NYANGGRA DINA DEWA YADNYA
PUPUH SINOM
ADA JANI KATUTURAN
TUTUR IDA MARAGA LUWIH
JENEK MARING SIWA PADA
BATARA SIWA MAKA NAMI
MAMBEK PACANG NYOBA RABI
BATARI UMA NE KAPUNGKUS
NE KACOBA OLIH IDA
BAKTIN AMBEK IDA BATARI
SAMPUNIKU
AMBEK IDA BATARA SIWA
SADURUNGE CAWIS TITIANG
TITIANG NUNAS AGUNG SISIP
MARING IDA SASUHUNAN
MUAH SANE MIRENG SAMI
WIREH SEKAR ALIT NIKI
WARNANNYANE HYANG SINUHUN
MOGI TITIANG TAN ALPAKA
NGUNDAG SEKAR ALIT NIKI
DAGING IPUN
IWANG PATUT AMPURAYANG
KOCAP IDA BATARA SIWA
DI PAMEREMAN NGEKA BUDI
MAPI-MAPI SAKIT RAHAT
RARIS MATUR RING BATARI
PANGUCAPI SARAT TUWI
MAPI NORA DADI BANGUN
DUH ADI BATARA UMA
TULUNG DEWEK BELI ADI
BELI LACUR
NADAK BELI SAKIT RAHAT
BATARI UMA RARIS NGUCAP
NULI IDA MATUR BAKTI
SINGGIH RATU NAWEG PISAN
NAPI ANGGEN MANGUBADIN
WIREH TITIANG NORA UNING
APANG TUARA SALAH LAKU
DENING TITIANG MAWAK MUDA
TITIANG TAKUT NEMU SISIP
SAMPUNIKU
KOCAP IDA BATARI UMA
PUPUH MASKUMAMBANG
DUH SANG AYU, BATARI UMA ADIN BELI
OJA WALANG MANAH
PRADE TUHU SATYA BAKTI
LAWAN BELI MAHANGKEPAN
SANE MANGKIN KEMA SAMPUN LUAS ADI
DURUS KA SEKALA
NGALIH LEMBU WARNA PUTIH
EMPEHANE RURUH KEMA
SINGGIH RATU AKSI TITIANG MATUR BAKTI
BAHAN IDEP SATYA
CUTET TITIANG NUNAS PAMIT
BATARA SIWA RARIS NGUCAP
SADURUNGE MANGKIN ADI NINGGAL BELI
MARING LEMAH PADA
BELI MANGKIN MAPET MUNYI
SATSAT BEKEL ADI LUAS
PRADE DURUNG ADI POLIH TAMBAN BELI
RIKANG LEMAH PADA
EDA ADI MEDEK BELI
PABESEN BELINE RESEPANG
KAPINDONE PAPET BELI MARING ADI
OJA NYASAR CITA
SAMPUNIKA PAPET BELI
DURUS ADI NE LUMAMPAH
PUPUH DURMA
SINGGIH RATU DURUS AKSI SEMBAH TITIANG
TITIANG NUNAS PAMIT JANI
RIWUS IDA MATUR SEMBAH
RARIS IDA NE LUMAMPAH
MABUR LAMPAH IDA BATARI
RING UMBARA
NGALAWAT GENAH ILEMBU PUTIH
NGANTOS LESU LAMPAH IDA MANGULAYANG
NGAWAS GENAH I LEMBU PUTIH
MASIH DURUNG KACUNDUKANG
MALIH IDA NGNDAG LAMPAH
MIDER-IDER MARING LANGIT
KANCIT ANA
KATON IDA WANA SRIPIT
JANI WARNA BATARA SIWA DI PAMEREMAN
SEDEK IDA NGEKA BUDI
SUBA PUPUT NGEKA NAYA
RARIS TURUN KA SEKALA
AYAT NYOBA AMBEK I RABI
MARING ALAS
LEMBU KRESNA KALINGGIHIN
GELIS RAWUH LAMPAH IDA RING SEKALA
MARING TENGAH WANA SRIPIT
RARIS IDA NYUTI RUPA
NYUTI DADI RARE ANGON
MUNGGUING SRANA IDA LAKI
LEMBU KRESNA
KAWASTU LUH WARNA PUTIH
PUPUH GINADA
KOCAP MALIH BATARI UMA
KARI IDA MARING LANGIT
DIMARANE NGATON ALAS
RARIS IDA BATARI TURUN
SUBA NAMPEK MARING LEMAH
PUKUL KALIH
RIKANG TENGAH ALAS RAMIA
RARIS IDA NYUSUP WANA
NGALIH GENAH I LEMBU PUTIH
NORA NGITUNG MADURGAMA
TEGEH LEBAH MASIH TUWUT
KOCAP DAUH PUKUL TIGA
IDA BATARI
KANCIT NEMU RARE ANGON
ATIAN PISAN KAYUN IDA
NEMU ANAK NGANGON SAMPI
BAHAN SAMPINE NYANE PETAK
RARIS IDA NYAWIS MATUR
JERO LANANG NAWEG PISAN
KAPING SINGGIH
TITIANG NYELAG MATUR TANYA
JERO LANANG ULI DIJA
DADI PURUN TANPA KANTI
ADA MARING TENGAH WANA
NGANGON SAMPI PUTIH TULUS
KETO JERO TANYAN TITIANG
PRADE PELIH
TITIANG NUNAS IWANG NATA
PUPUH PANGKUR
PANGANGONE LAGAS NGUCAP
INGGIH JERO ANAK ISTRI TITIANG YUKTI
PECAK SAKING DESA UTUH
MUAH KADI SAMPIN TITIANG
YAN TAN PEDAS, IKU SARANAN TITIANG IDUP
TAN BINA KADI TITIANG
SATSAT JIWAN TITIANG MAURIP
CUTET SUBA UTANG TITIANG
KALIH KADI JERO ISTRI MAKA YUKTI
ULI DIJA WITE TUHU
DADI PURUN ADIRIAN
MAWAK WADON ADA MARING ALAS GUNUNG
YUKTIN JERO PACANG KIJA
BATARI UMA MANYAWURIN
PUPUH GINADA
INGGIH JERO MAWAK ANGON
TITIANG SADIA MANGATURIN
APANG JERO LANANG WIKAN
RING PANANGKAN TITIANG TUHU
TITIANG SAKENG INDRALOKA
TANPA KANTI
TURUN MARING JAGAT PADA
KRANA TITIANG PURUN NGALAS
MAWAK WADON TANPA KANTI
WIREH SAKING ADA BUAT
NGALIH LEMBU PUTIH TULUS
SEDENG LUWUNG LAMPAH TITIANG
JERO LAKI
KACUNDUK NGANGON LEMBU PUTIH
GELIS JANI ATUR TITIANG
JERO PANGANGON LEMBU NIKI
DONG OLASIN YAKUDA TITIANG
MAWAK WADU NUMBAS SUSU
ANTUK PERAK, MAS, SASOCAN
YADIN KIDIK
JERO NGICEN TITIANG NANGGAP
I PANGANGON MALIH NUAL
INGGIH JERO ANAK ISTRI
AMPURAYANG PISAN TITIANG
TITIANG NORA NGADOL SUSU
ANGGEN NAPI MAS PUNIKA
MIWAH PIPIS
WIREH TITIANG WONG DI ALAS
NYAWUR IDA BATARI UMA
NUNAS ICA NGASIH-ASIH
INGGIH JERO MAWAK ANGON
DONG PICAIN TITIANG DUMUN
YADIN KIDIK ICEN JERO
TITIANG NAMPI
SATSAT TITIANG NUNAS JIWA
PRADE JERO TAN MADOLAN
ICEN TITIANG NUNAS AKIDIK
PACANG ANGGON TITIANG UBAD
SUSUN LEMBUN JRO PUNIKU
TITIANG SAKING SARAT PISAN
KADI MANGKIN
LAWAN JERO ANAK LANANG
JERO ISTRI AMPURAYANG
CUTET TITIANG TAN NGATURIN
SADURUNGE JERO LEDANG
NGICEN TITIANG LEGAN KAYUN
WIREH KADI SAMPIN TITIANG
SASAT URIP
IDUP TITIANG MARING LEMAH
PUPUH DURMA
BATARI UMA DAHAT ERANG MAMIRENGANG
TUR SUMAHUR IDA MANUDING
IH IBA RARE ANGON
PONGAH IBA BAHAN NARKA
KADEN NIRA ISTRI JALIR
KENEHANG IBA
SARAT NGALIH BUKA CAI
YENING IBA NORA PEDAS LAWAN NIRA
MAKA YUKTI NIRA BATARI
RABIN IDA BATARA SIWA
KASUB MARING SIWA LOKA
KALIWAT IBA YANG TAN UNING
NIRA NGARAN
IDA BATARI GIRI PUTRI
SANG PANGANGON RARIS NUAL SADA BANGRAS
YADIN JERO RATUN BATARI
KAI NORA PACANG NYEMBAH
NAPI MALIH NUEKIN TTIANG
SAYAN-SAYAN IDEP KAI
MIKUKUHANG
EMPEHAN SAMPIN KAINE NIKI
DENING MANUT KADI BASAN KAINE BUSAN
DUEN KAI DAHAT PINGIT
ALA AYU BELA GELAH
YASTUN KAI KENI DUKA
MASIH KALAMPAHIN KAI
REH DI LEMAH
LEMBUN KAI DOGEN PUTIH
SAMPUNIKA DASAR KAINE MINGITANG
LEMBUN KAINE PUNIKI
YASTUN BATARI MANYARATANG
WATAK GAMANG TULAK GELAH
KETO YUKTIN AMBEK KAI
DAHAT SATYA
MINGITANG GELAH PADIDI
MALIH IPUN LEMBUN KAI SATYA PISAN
LAWAN KAI NE MAURIP
YADIN IA MAWAK BURON
NANGING IDEPNE UTAMA
WALUYA IDEP WONG UTAMI
NGELAH AMBEK
PARAS PAROS SALING TINDIHIN
MAKA CUTET BESEN KAI LAWAN IBA
YENING IBA SALIT ARTI
JALAN SUBA NE PASAHAN
NANGING INGET BESEN GELAH
PET JERONE NGISININ
PABUAT GELAH
SARAT JERONE JANIN KAI
PUPUH SINOM
SAGET NANENG BATARI UMA
SAMBIL IDA NYIKSIK BUDI
NULI ELING RING UBAYA
BATARA SIWA MISELETIN
PRADE DURUNG MIKOLIHIN
TAN KALUGRA IDA MANTUK
KANCIT SEBET KAYUN IDA
MIDEP MANGDA MAPIKOLIH
RARIS DITU
IDA MANYERAHANG RAGA
SUBA PUPUT SALING ARSA
RISANG ANAK NGANGON SAMPI
RARIS IDA NAMPI EMPEHAN
PAMIT IDA TUR MAMARGI
TAN KAWARNA MARING MARGI
RING SUARGA SAMPUN RAWUH
NGUNDAG MADEP BATARA SIWA
NULI MATUR MANUBAKTI
INGGIH RATU
CINGAK RATU TITIANG RAWUH
DAHAT BAGIA LAMPAH TITIANG
NGALIH SUSU LEMBU PUTIH
PAKON I RATU MANUT PISAN
NUDUH TITIANG NE MAMARGI
MANGKIN SAMPUN TITIANG MOLIH
NGING AMATRA PISAN RATU
KALIH AMPURAYANG PISAN
TITIANG NINGGAL RATU SAKIT
TUR SUMAHUR
IDA BATARA MISEKENANG
PUPUH MASKUMAMBANG
SAKING SADIA LAMPAH ADI NINGGAL BELI
NAPAK JAGAT PADA
GELIS ADI MAPIKOLIH
NGALIH SUSU LEMBU PETAK
ANGING MANGKE ADA TARIN BELI BEDIK
ACEP RING I DEWA
ULIH NAPI ADI MOLIH
TAMBAN BELINE DI LEMAH
SINGGIH RATU TITIANG WANTAH POLIH MELI
DITU RING SEKALA
LAWAN ANAK NGANGON SAMPI
NARING TENGAH ALAS WAYAH
KOCAP NYAWIS BATARA SIWA DAHAT BRANGTI
ADI DAHAT LINYOK
ATUR ADI MIMPAS TUWI
NORA MANUT RING LAKSANA
PUPUH PANGKUR
DUH ADI BATARI UMA
NAPI SAKING TUHU ADI MOLIH MELI
SUSUN LEMBUNE PUNIKU
NAPI ANGGON ADI NUMBAS
APAN PIDAN DAWEG ADINE LUMAKU
NINGGAL BELI KA SEKALA
BELI NORA MITUKUIN
RABIN IDA TANPA NGUCAP
BAN RUMASA IDA MARING RAGA SISIP
INGET TEKEN SALAH LAKU
NORA PAGEH NGEMIT DHARMA
DAHAT KEMAD NGUNTUL IDA TANPA SAHUT
TOYAN AKSINNYANE MEMBAH
BAHAN KIMUDE TAN GIGIS
BATARA SIWA SAYAN DUKA
MIRENG ATUR IDA BATARI LINYOK TUWI
TUR SAHASA IDA MASTU
RUPAN IDA BATARI UMA
BAHAN BOBAB IH KITA BATARI AYU
MANGKIN IRA MASTU KITA
RANINI DURGA IRANTA MANGKIN
PUPUH GINADA
MARA MANDEG WASTUN IDA
KANCIT OBAH RUPAN BETARI
ROMO BERIT MUKA ABANG
TANPA SAMA GEDE GANGSUH
MAKA MIWAH SOCAAN IDA
YAN UPAMI
MURUB KADI SURYA KEMBAR
MARA IDA NGARASAYANG
RAGANNYANE NYUTI WARNI
JEG MANGERAK IDA NGUCAP
NANGIS NUNAS PANGSTU PUNGKUR
AMPURA RATU SISIP TITIANG
KADI MANGKIN
TITIANG NUNAS GUNG AMPURA
DURUS RUWAK MALAN TITIANG
PANG MATULAK KADI RIHIN
KETO ATUR BATARI UMA
SAMBIL NANGIS IDA MATUR
NGASIH-ASIH NUNAS ICA
KOCAP MALIH
IDA BATARA SIWA NGANDIKA
DUH KITA BATARI DURGA
OJA MANGKIN NYOKANG ATI
APAN SAMPUN MANGKIN IDA
MAKA WASTU NIRA IKU
TAN KAWENANG TULAK MUAH
RENGA MANGKIN
ATENGER IRA LAWAN KITA
APAN KITA AGUNG DOSA
TUNA KENEH KITA MANGKIN
MAKA SISIP SOLAH KITA
LAMANIA RORAS TAHUN
KALA IKU AYAT TEKA
MAKA INDIK
PANYUDAMALAN WARNAN KITA
MANGKIN IRA NE ANGUAT
LAWAN KITA SANG RANINI
APANG SAMPUN KATON IRA
PANDAWA NGELAH PANCA SUNU
MAKA PANCA SANAKNIA
LAKI-LAKI
ARAN SULUNG YUDISTIRA
SANG BALAWA KAPING RWA
SANG ARJUNA NE PING TRI
KAPING CATUR SANAKNIA
SANG NAKULA KASENGGUH
MUAH SANAK NE KEPANCA
KAARANIN
SAHADEWA TANPA ALAN
APAN I SANG SAHADEWA
AMBEKNIA TANPA WECI
MUAH MOLIH ANUGRAH HYANG
PANGASTU PUNGKUR SARWA LETUH
KADI MANGKIN RUPAN KITA
DUH RANINI
SAHADEWA WENANG NYUDA
MUAH NGAWIT MANGKIN KITA
ANUNGGU RIKANG LEMAH SUCI
SETRA GANDA MAYU NGARAN
WUS SAMPUN IRA AMUWUT
DURUS MANGKE KITA MANGKAT
TUR MAMARGI
IDA BATARI RANINI DURGA
PUPUH SINOM
GELIS MANGKIN CARITAYANG
IDA BATARI NE MALINGGIH
MARING TUNAN MAUTAMA
SARENG AMBAN KALIH DIRI
SANG KALIKA ARANE LAKI
SANG KALIKI SANE WADU
DURUNG LAMI KACARITA
KANCIT ADA NYUSUP PRAPTI
KALIH UKUD
RUPAN IPUN TANPA BEDA
MANGADPADA SARENG RWA
MATUR SEMBAH RING BATARI
RATU BATARI NAWEG TITIANG
LACUR TITIANGE TAN KADI
KRANA TITIANG MEDEK BATARI
TITIANG SAKING KENI TUDUH
BATARA GURU NE MAPAKON
APANG TITIANG NGIRING BATARI
SARENG RATU
JENEK MARING TENGAH SETRA
BATARI DURGA ALON NGUCAP
DUH KITA DANUJA KALIH
SADIA PISAN RAWUH I DEWA
NANAK MEME SARENG KALIH
NAPI KARANANE MARIKI
I DANUJA ALON MATUR
SAKING DAHAT LACUR TITIANG
KENI SUPAT TITIANG BATARI
SAMPUNIKA
DEWEK TITIANG SARENG RWA
KARANA JANI DEWEK TITIANG
MAWAK YAKSA SARENG KALIH
WIREH TITIANG KOCAP IWANG
NGALUHURIN IDA MASUCI
RING TAMAN SARENG BATARI
KETO YUKTIN WITNE RATU
NULI DUKA IDA BATARA
LAWAN TITIANG SARENG KALIH
TUR KAWASTU
DEWEK TITIANG DADI YAKSA
YUKTI KADI DEWEK TITIANG
SAKING KENDRAN SARENG KALIH
CITRA GANA PARAB TITIANG
CITRA SENA MING ASIKI
TITIANG WANTAH MULA TUNGGIL
SINARENGAN TITIANG METU
SUBAN TITIANG KENI SUPAT
I KALANTAKA KAPARABIN
KALIH IPUN
NYAMAN TITIANG I KALANJAYA
CENING DEWA KALANTAKA
MUWAH KALANJAYA CENING
PRADE KETO LING I DEWA
SANE LAWAN MEME CENING
SANGKAN MEME ADA DIDI
MARING SETRA GANDA MAYU
MEME TUAH KENI SUPAT
OLEH BATARA SIWA SUCI
BUAT SASUDUK
MEME IWANG MOBAB IDA
MATUR MALIH I KALANTAKA
NAWEG TITIANG RATU BATARI
MANUT KADI WALAN TITIANG
SIDA MATULAK KADI RIHIN
BATARI DURGA MANYAWURIN
SAHA IDA MAPITUDUH
SAPUNIKI KALANTAKA
MWAH KALANJAYA CENING
SANE PATUT
PACANG NYUDAMALAN I DEWA
BATARA GURU NORA SIMPANG
SANE PATUT NYUDA CENING
MALAN MEME MAKADINNYA
WANTAH IDA WENANG MANDUSIN
ANGING DURUNG JANGKEP INDIK
KENI KURUNG RORAS TIBAN
DITU MARA KASUDANIN
SAMPUNIKU
KALANTAKA KALANJAYA
PUPUH GINADA
DUH CENING KALANTAKA
NGIRING JANTOS MING AKIDIK
WATES MEME LAN I DEWA
KADI MANGKIN KENI KURUNG
EDA JUA MANYENGGUHANG
PINIH BECIK
KEMA JANI CENING LUAS
SARENG KALIH NE LUMAMPAH
RING ASTINA PURI MANGKIN
MANGADPADA RING SANG NATA
NE NGAMBEL BALANE DITU
REH PANJAK DI KORAWA
KEWUH MANGKIN
MAYUDA LAWAN SANG PANDAWA
KEMA JANI MAPIOLAH
JANTEN CENING NE KATAMPI
DENING JUA YAKSA KENDRAN
SARENG KALIH MALARAWA
SAMPUNIKA ATUR IDA
YAKSA KALIH
MATUR SEMBAH TUR MAMARGA
TAN KOCAPAN MARING JALAN
RING ASTINA GELIS PRAPTI
LANTUR PEDEK SARENG RWA
MARING IDA SANG PERABU
PANYEKERAN BALA DI KORAWA
SANG KALIH
PADA MATUR MANGADPADA
SUGRA RATU RAWUH TITIANG
EDA RATU SALIT ARTI
NGATON KADI RAWUH TITIANG
SARENG KALIH RING I RATU
NORA SIMPANG YUKTIN TITIANG
ANE MARIKI
TITIANG OLIH DEWI PAKON
IBUN TITIANG NE MAPAKON
APANG RAWUH DINA JANI
MADEG ANGGON SRI NARENDRA
KETO YUKTIN NYANE RATU
RANINI DURGA RATUN TITIANG
TITIANG NIKI
PUTRAN IDA SARENG RWA
ARAN TITIANG KALANTAKA
KALANJAYA NE PUNIKI
MANUT KADI RAWUH TITIANG
SARENG NUMUT PAKON IBU
KAPAKON TITIANG MAPIOLAS
SARENG KALIH
NGAREPIN MESEH COKOR I DEWA
KOCAP JAGAT INDRAPRASTA
BALA MANTRI KEWEH SAMI
BAHAN SAMPUN MIRENG GATRA
KURAWANE ADA NULUNG
WATEK YAKSA SAKENG KENDRAN
SARENG KALIH
DAHAT SAKTI MIWAH KAWA
PUPUH DURMA
DEWI KUNTI DAHAT WIRANG KAYUN IDA
WIREH IDA SAMPUN UNING
RING PANGKAN IDA NUJUH
PIANAK NIRA NINI DURGA
SANE TUHU SAKTI-SAKTI
SARENG RWA
RAWUH MELA ASTINA PURI
RARIS IDA DEWI KUNTI NYISIK CITA
PUPUT IDA MAMINEHIN
RARIS NGENGGAL IDA MEDAL
SAKING PURI INDRA PRASTA
AYAT PEDEK RING BATARI
MARING SETRA
TANPA TUNTUN MAMARGI
MARA NAPAK DEWI KUNTI MARING SETRA
ATIAN AMBEK IDA BATARI
NGATON ANA ANAK PRAPTA
MEDEK IDA MARING SETRA
IDA BATARI ATANYA NYAWIS
IH MANUSA
NAPI SARATE MARIKI
DEWI KUNTI RARIS NUAL SEMBAH
AMPURA RAWUH TITIANG BATARI
MANUT KADI SARAT TITIANG
PEDEK MARING SASUHUNAN
JENEK NUNAS PATI URIP
MESEH TITIANG
ANE SAKTI APANG MATI
DADI NIMBAL BATARI DURGA MANUHARA
SIRA SATRUN NYAI KUNTI
DENING MEME MARA PEDAS
LAWAN SATRUN I PANDAWA
DURUS MEME NE ATURIN
MUAH ANGKIHAN
ANE AYAT CABUT NYAI
DEWI KUNTI ARIS IDA NGUNINGAYANG
AMPURA RATU SANE MANGKIN
I KALANTAKA MESEH TITIANG
MENG ASIKI I KALANJAYA
SARENG RWA PADA SAKTI
MUAH KAWA
NIKA TUNAS TITIANG MANGKIN
PUPUH SINOM
PRADE KETO SARAT I DEWA
MEME NORA NGALEDANGIN
APAN IPUN I KALANTAKA
MUAH KALANJAYA CENING
SUNUN MEME MAKAKALIH
NORA WENANG NYAI NYABUT
SADURUNGE MAPALABA
LAWAN MEME KADI MANGKIN
DAGING IPUN
NASI TANGKEP KAPERTAMA
MUAH KADI ULAMNIA
GULING KAMBING BANG SINUNGGIL
MAKA MIWAH SAHADEWA
PUTRAN NYAI PINIH ALIT
KETO CENING DEWI KUNTI
DEWI KUNTI ALON MATUR
RATU BATARI AMPURAYANG
SENGKA TITIANG MANGITUNGIN
LING I RATU
NUNAS IPUN I SAHADEWA
DENING IPUN I SAHADEWA
BOYA SUNUN TITIANG JATI
PRADE TITIANG MANGATURANG
JANTEN SAMPUN KENI SISIP
YENING SUNUN TITIANG JATI
TITIANG BOYA PANJANG MATUR
YAN I RATU SAKENG LEDANG
PIANAK TITIANGE NE PILIHIN
JANTEN SULUNG
MADE, NYOMAN NGGIH DURUSANG
NGUCAP MALIH BATARI DURGA
DUH CENING DEWI KUNTI
ATUR MEME PADINGEHANG
KALIH SIKSA JERONING HATI
SANE PATUT ATURANG NYAI
MULA SAHADEWA IKU
KETO UJAR BATARI DURGA
DEWI KUNTI MANYAWURIN
AMPURA RATU
TAN PRASIDA TITIANG NGATURANG
DEWI KUNTI YA LUMAMPAH
NINGGAL LUNGGUH IDA BATARI
IDA BATARI MALIH KOCAP
SANG KALIKA KAPESENGIN
DUH DEWA PIANAK BIBI
KEMA CENING NE LUMAKU
NGETUT LAMPAH I KUNTI BUDAL
SURUPIN IPUN ULI WINGKING
APANG URUNG IDEP IPUN MANGKIN BUDAL
GELIS RUSAK HIDUP NIA
APANG BASAN IPUN PALING
SANG KALIKA ALON NGUCAP
NAWEG TITIANG RATU BATARI
NAPI IWANG IA I KUNTI
BATARI DURGA NE MASAWUR
SAPUNIKI SANG KALIKA
BATARA GURU NE NGATURIN
BUAT UNDUK
MEME NANDANG KANERAKAN
PRADE JANGKEP RORAS TIBAN
TAPAN MEMENE PUNIKI
KALA DITU NE KARUAK
BAHAN SUNUN KUALON KUNTI
SAHADEWA NE MAPASIH
ANAK BAGUS TANPA LETUH
DAUH TUNI MEME NYELANG
SAHADEWA RING I KUNTI
ANGING LACUR
DEWI KUNTI TAN NERIMA
KETO CENING SANG KALIKA
SANGKAN MEME MAKON CAI
SANG KALIKA MATUR SEMBAH
NULI PAMIT RING BATARI
NGETUT LAMPAH DEWI KUNTI
KACUNDUK RING TENGAH ENU
RARIS DITU SANG KALIKA
MANYUSUPIN DEWI KUNTI
SAGET DITU
DEWI KUNTI MANGKREG LAMPAH
MIJIL IDEP NYANE OSEK
IWANG MARING KAUH KANGIN
JEG MATULAK MANAH IDA
MAWALI PEDEK RING BATARI
GELIS LAMPAH NE KAWARNI
NAPAK SETRA GANDA MAYU
BATARI DURGA TANYA MUAH
NGUDA CENING MALIH MARIKI
TANPA TUNTUN
NGUDA TAN NGIRING SAHADEWA
DEWI KUNTI TANPA TUAL
BAHAN BINGUNGE TAN KADI
RARIS IDA PAMIT BUDAL
NGALIH PUTRAN PINIH ALIT
GELIS LAMPAH NE PRAPTI
MARING INDRA PRASTA MUNGGUH
KOCAP IDA SANG ARJUNA
NGATON IBUNE PRAPTI
RARIS MATUR
LAWAN RAKA RAIN IDA
Posting Komentar untuk "Gaguritan Sudhamala"