Gaguritan Panca Datu: Wit Wastan Jagat Bali
DANGDANG GULA
HYANG BETARA
SANG HYANG AJI SARASWATI
MOGI LEDANG
NUNTUN TITIANG NGURIT GITA
NGWERDIANG SASTRA DRESTANE
MURDAN GITA PANCA DATU
KAWIT WASTAN JAGAT BALI
ANGGEN SULUH MANAH KRAMA
MANGDA DRESTA TEKEK KAMONG
NGAJEGANG BALI PULINA
TITIANG TAMBET
TEN MANUT INDIK ATURE
AMPURAYANG TITIANG GUSTI
1.
SINOM
KACRITA DAWEGE LAWAS
RING JAWI WENTEN RSI LUIH
MARKANDIA PARAB IDA
PASRAMAN IDANE ASRI
RING PUCAK RAUNG LINUIH
SISIAN IDA AKEH TUHU
ULENG MLAJAH KANDA SASTRA
SOLAH IPUN SADU BUDI
GILIK GULUK
SALUNGLUNG SABAYANTAKA
2.
SINOM
MAHARESI MARKANDIA
ULENG NGASTAWA HYANG KAWI
NGRASTITIANG KERTAN JAGAT
KALANING DEWASA BECIK
PURNAMA KAPAT LINUIH
HYANG PASUPATI RAUH
RSI MARKANDIA MANYEMBAH
“SWASTI ASTU NAMOSTUTI
SINGGIH RATU
DURUS AKSI SEMBAH TITIANG”
3.
GINADA
HYANG PASUPATI MASABDA
“SEMBAH RESI NIRA NAMPI”
PUPUT IDA MAWECANA
TELENG LELATANE MURUB
RARIS METU TEJA PETAK
MLECAT GELIS
NGAWANG-AWANG RING AMBARA
4.
GINADA
TEJA MELECAT RING PURWA
NUSA DAWA NE KAUNGSI
HYANG PASUPATI MASABDA
“RESI JANI UTUS INGSUN
NGUNGSI GUMI TIBEN TEJA
DITU RESI
NABDAB GUMI APANG KERTA”
5.
GINANTI
SAPUPUT IDA MAWUWUS
MALECAT RING SUNYA ENING
RARIS SANG RESI NGANDIKA
“BAPA MAAN WISIK KAWI
APANG NABDAB NUSA DAWA
KENKEN IDEP PAMAN JANI?”
6.
GINANTI
SISIAN IDA GELIS MATUR
“YAN RESI MAGINGSIR LINGGIH
JAGI NGUNGSI NUSA DAWA
TITIANG SAMI JAGI NGIRING
REH TITIANG TAN SIDA PASAH
NUNAS AJAH RING SANG RESI”
7.
GINANTI
RSI MARKANDIA MAWUWUS
“PAMAN SAJA SATIA BAKTI
EDA ONYA NUGTUG BAPA
NUSA DAWA SRIPIT GATI
KANGGOANG MALU AJAK DOMAS
NGIRING BAPA NABDAB GUMI”
8.
PANGKUR
RARIS RESI MARKANDIA
NGUNGSI NUSA DAWA SISIANE MANGIRING
MAMARGI RAHINA DALU
RAUH MARING NUSA DAWA
RARIS IDA RING SISIA SAMI MAWUWUS
“NAH LAUTANG NGALGAL ALAS
ANGGON PADUKUHAN DINI”
9.
PANGKUR
SISIAN IDA NGIRING TITAH
NGALGAL ALAS MONGGOL TARU AGUNG ALIT
KIDANG LUTUNG SAMI RARUD
DEWATA RING NUSA DAWA
KAGIAT NGAKSI SISIA MONGGOL TARU
RARIS NGATAG RENCANG IDA
BUTA-BUTI KALA-KALI
10.
PANGKUR
BUTA KALANE MANGUCAP
“RATU NAPI WENTEN KARYA SANE MANGKIN”
HYANG BETARA MAWUWUS
”ENE ADA JLEMA PANGKAH
IA NGALGAL ALAS SING NGANUTIN UNDUK
TUSING MADULURAN YADNYA
LAUTANG TADAH NE JANI”
11.
GINADA
BUTA-BUTI RARIS NGUCAP
“MULA GAEN INGONG IKI
NADAH JLEMA TAN PAYADNYA”
PUPUT MATUR SAPUNIKU
AJI WEGIGNE KUNCARANG
SISIAN RESI
NGUTAH MISING RARIS PADEM
12.
GINADA
WENTEN TEPEN TARU AGENG
RUNTUH MARING PANGKUNG ABING
SARAP MACAN KABINAWA
WENTEN KAANYUDANG BLABUR
WENTEN PADEM SANDER KILAP
AKEH GATI
SISIANE NGEMASIN PADEM
13.
MASKUMAMBANG
SANG PANDITA
MAWECANA SADA SEDIH
“PAMAN SISIAN BAPA
YENING KUKUH NGOYONG DINI
SINAH MATI JAK MEKEJANG
14.
MASKUMAMBANG
PALING MELAH
JALAN MALIPETAN MULIH”
MATUR SISIAN IDA
“MEDAGING WECANAN RESI
NGIRING NE MANGKIN MATULAK”
15.
MASKUMAMBANG
SISIAN IDA
KANTUN NYENENG SAMAS DIRI
GEGESON MATULAK
SAMPUN RAUH MARING JAWI
NGUON ATI SEMU UCEM
16.
SEMARANDANA
IDA MARKANDIA RESI
NGUNGSI GENAH JATI MULA
PUCAK GUNUNG RAUNG KAOT
DRIKA IDA MANGASTAWA
“INGGIH RATU HYANG BATARA
NGAWIWENANG BUANA AGUNG
AKSI SEMBAH BAKTIN TITIANG
17.
SEMARANDANA
RATU SESUNAN LUIH
RIIN RATU NITAH TITIANG
NABDAB NUSA DAWA REKO
TITIANG SAMPUN NGIRING TITAH
DADOS RATU NENTEN SUECA
SISIAN TITIANG AKEH LAMPUS
NAPI WENTEN IWANG TITIANG”
18.
SINOM
HYANG PASUPATI NYLANTARA
“PANG I DEWA TATAS UNING
NIRA NE JANI NARTAYANG
TIGA DASAR HINDU JATI
YADNYANE MAKA PANGAWIT
KATUR SAKING MANAH NULUS
PING KALIH SOLAH SUSILA
TATWANE MAKA KATRINI
KRAMA HINDU
PATUT NYALANANG ‘NTO ONYA
19.
SINOM
SILIH TUNGGIL DASAR GAMA
NE MARUPA YADNYA SUCI
TUSING JALANANG I DEWA
NGAWINANG DEWATA BRANGTI
KEMA JANI RESI BUIN
NABDAB JAGAT, YADNYA KATUR
NE DI SOR, KEN BUTA KALA
NE DI LUHUR KEN DEWATI
SINAH WIKU
SIDA NABDAB NUSA DAWA”
20.
GINANTI
MAHARESI SUKSMA TUHU
POLIH WISIK PASUPATI
RARIS IDA MATUR SEMBAH
MALECAT HYANG PASUPATI
RARIS IDA MABAOSAN
MARING SISIAN IDA SAMI
21.
GINANTI
“UDUH PAMAN SISIAN INGSUN
BAPA BUIN KAL MAWALI
NABDAB JAGAT NUSA DAWA
ADA KE PAMAN KAL NGIRING?
LAUTANG MATUR KEN BAPA
KENEH PAMANE SUJATI”
22.
MIJIL
PANJAK MATUR
“MANAH TITIANG NUNGGIL
BECIK YADIN KAON
SAYAGA NGIRING ANGGAN RESINE
IDUP PADEM MANGDA SARENG RESI
TITIANG SAMPUN GILIK
NGIRING ANGGAN WIKU
23.
DURMA
SANG RESI LEDANG MIRENG ATUR I SISIA
SANE KANTUN SAMAS DIRI
NIKA NGIRING IDA
TUR GEGANCANGAN MAMARGA
RARIS RAUH RING TOH LANGKIR
GENAH NIRMALA
NANGING PINGITE TAN SIPI
24.
DURMA
RARIS IDA NYUKAT GENAH NANGUN YADNYA
CARUNE KATURANG RIIN
BUTA KALA DENGEN
SAMI RAUH NADAH YADNYA
RARIS IDA MAHARESI
MENDEM P’DAGINGAN
PANCA DATU WASTAN WALI
25.
DURMA
SASAMPUNE PUPUT MANGATURANG YADNYA
RARIS NGALGAL WANA SRIPIT
SISIANE RAHAJENG
LANTUR NANGUN SAWAH TEGAL
ASING TANDUR MUPU SAMI
KERTA RAHARJA
GEMAH RIPAH LOH JINAWI
26.
SINOM
RSI MARKANDIA GARJITA
RING SISIA MABAOS ARIS
“ENE DINI TONGOS PAMAN
NAH SUBA SEKEN MABUKTI
PAMAN MANGGUH KERTAN URIP
ENTO ANGGON DASAR INGSUN
ANGGON PINGET RING KAWEKAS
DINI ADANIN BESAKIH
SUKSMAN IPUN
TEGES BESAKIH RAHAJENG
27.
SINOM
ENE BUIN BESIK PAMAN
TONGOS BAPA NANGUN WALI
PANCA DATUNE KAPENDEM
DITU GAENANG PALINGGIH
BASUKIHAN ADAN P’LINGGIH
NAH ENTO ANGGON PAMUCUK
TONGOS NGASTAWA BETARA
APANG IDA ASUH ASIH
NUNTUN DAMUH
NYIRATANG KAKERTAN JAGAT
28.
GINANTI
APANG ADA PINGET TUHU
OLIH KRAMANE RING GUMI
BAPA DINI NABDAB JAGAT
KADULURAN BAAN WALI
JANI BAPA MAANG ADAN
DINI KUCAP JAGAT BALI
29.
GINANTI
BALI WALI TEGES IKU
WALI DASAR GUMI BALI
WALI TALER KUCAP YADNYA
YADNYANE NGAJEGANG BALI
TEGES BALI KUKUH SITENG
BALI KUKUH SANGKAN WALI”
30.
PUCUNG
SISIA MATUR
“INDIK YADNYA SANE KATUR
WENTEN PANJAK NGRENGGENG
NELASANG BEA KEH GATI
KUCAP KEWUH
AGAMA HINDU PUNIKA”
31.
PUCUNG
KENYEM ASRU
RSI MARKANDIA MAWUWUS
“PAMAN MAAN MERTA
SAKENG SUECAN HYANG WIDHI
PAMAN PATUT
MATUR SUKSMA BAAN YADNYA
32.
PUCUNG
YADNYA KATUR
METU SAKING MANAH NULUS
SIKUTANG RING RAGA
NISTA MADIA LAN UTAMI
BENJANG PUNGKUR
APANG SING NYELSEL AGAMA”
33.
DURMA
SISIA SAMI MATUR “WAWU TITIANG TATAS
PARI INDIK JAGAT BALI
YADNYA DASAR JAGAT
TITIANG SAMI MUNDUT TEKEK
NYARWAKANG SENTANA SAMI
PAGEH MAYADNYA
MANGAJEGANG JAGAT BALI”
DURMA
GITA PANCA DATU SAMPUN KATEMBANGANG
KAWIT WASTAN JAGAT BALI
NGIRING PUNDUT TEKEK
MANGDA JAGAT BALI AJEG
KIRANG LANGKUNG SINAMPURI
NGIRING PUPUTANG
SINEB ANTUK PRAMA SANTI
Posting Komentar untuk "Gaguritan Panca Datu: Wit Wastan Jagat Bali"