Geguritan Ramayana Kanda

GEGURITAN RAMAYANA KANDA

 

PUPUH SINOM

1.     Singgih ratu sasuhunan,

Pamucuk Hyang Saraswati,

Tityang ngaturang suksema,

Antuk ledang manywecanin,

Wastu puput ngardi Gurit,

Ramayana Kanda wuwus,

Nanging durung paripurna,

Antuk tambet tityang yukti,

Unjuk lungsur,

Tityang nunas pengampura.

 

2.     Jroning Kanda Ramayana,

Pitung Kanda yan wilangin,

Kaping siki Bala Kanda,

Ayodya Kanda kaping kalih,

Aranyaka Kanda ping tri,

Kiskinda Kanda kaping catur,

Sundara Kanda kaping lima,

Yudha Kanda ping nem yukti,

Kaping pitu,

Utara Kanda kebawosang.

 

3.     Ngawit crita Bala Kanda,

Nyaritayang Kosala Negari,

Ne mapuri ring Ayodya,

Sang Dasaratha merabunin,

Tetiga Ida meduwe rabi,

Dyah Kusalya pinih duwur,

Maputra siki Sang Rama,

Rabin Ida kaping kalih,

Kekayi wuwus,

Maputra siki Sang Beratha.

 

4.     Rabin Ida kaping tiga,

Dyah Sumitra maka nami,

Kekalih meduwe putra,

Sang Laksmana kaping siki,

Sang Satrugna kaping kalih,

Risampun putrane duwur,

Wenten kocap Swayembara,

Maring Methila Negari,

Pinaka Prabu,

Ida Sang Janaka Raja.

5.     Dewi Sita kaswayembara,

Yukti ida Istri luwih,

Dahat wikan wicaksana,

Kasub ring manca negari,

Katah Ratune buduh paling,

Nyarengin swayembara iku,

Nging Sang Rama mikolihang,

Antuk panahe kapatitis,

Mwastu elung,

Nglantur antuk Pawiwahan.

 

PUPUH DURMA

6.     Ayodya Kanda, sane mangkin caritayang,

Sang Dasaratha sampun lingsir,

Dahat ledang kayun Ida,

Risang Rama Dewi Sita,

Sampun manggeh Alaki-rabi,

Raris ngarsayang,

Mangda Ida kagentosin.

 

7.     Gatran Sang Rama pacang keanggehang Nata,

Sampun kapireng Dyah Kekayi,

Nuli nangkilin Sang Dasaratha,

Makelingang indik Subaya,

Sadurung Ida kanggen Rabi,

Sang Dasaratha,

Kocap masubaya rihin.

 

8.     Kekalih kocap daging Pasubayan Ida,

Kapertama Putran Kekayi,

Sang Berata dados Nata,

Boya Sang Ramadewa,

Rama ngalas patbelas warsi,

Nika ping rwa,

Sapunika atur Kekayi.

 

9.     Sang Dasaratha, dahat kosekan maring cita,

Mangda nenten linyok janji,

Subayane kemargiang,

Sang Rama kakutang maring Alas,

Panjak wadwa sami sedih,

Tur nyengguhang,

Sang Dasaratha iwang pemargi.

 

PUPUH MASKUMAMBANG

10.                        Mangkin crita Sang Rama lan Sita Dewi,

Kala ninggal Ayodya Pura,

Ajin Ida sedih kingking,

Mwastu sungkan rahat pisan.

 

11.                        Taler panjak sami nangis ngasih-asih,

Raris ngiringang pemargan Ida,

Tan purun ring Ayodya Puri,

Nenten sida keandegang.

 

12.                        Risampune rahinane nyaluk wengi,

Sampun napak maring Alas,

Mesandekan Ida raris,

Kairing antuk panjak wadwa.

 

13.                        Antuk kaleson panjak Ida sirep sami,

Raris katinggal antuk Ida,

Sang Rama nglantur memargi,

Kesarengin Laksmana Sita.

 

PUPUH SEMARANDANA

14.                        Crita malih wadwa sami,

Kala bangun pasemengan,

Kagyat sami tur ngetabtab,

Sang kairing sampun ical,

Mabriyukan nyusup alas,

Menek jurang tuwun pangkung,

Ngrereh Ida Sang Ramadewa.

 

15.                        Antuk banget manah subakti,

Nglantur malih ngatengahang,

Ngemaranin alas wayah,

Sang Rama tan kakeniang,

Mwastu panjak raris budal,

Gelis mangkin crita sampun,

Kocap rawuh ring Ayodya.

 

16.                        Sang Dasaratha ketangkilin,

Antuk panjak miwah wadwa,

Indik Sang Rama kauningang,

Ical maring alas wayah,

Sayan sungkan Ida Sang Nata,

Banget nyelsel maring kayun,

Mwastu Ida raris Lina.

 

17.                        Mabyayuhan sedaging Puri,

Antuk seda Ida Sang Nata,

Raris gelis kedabdabang,

Upacara Pengabenan,

Manut polahing Sang Nata,

Upacara sampun puput,

Nglantur Bisekan Sang Brata.

 

PUPUH PANGKUR

18.                        Crita mangkin Sang Berata,

Nenten arsa,

Keanggehang Narepati,

Kemad erang sungsut kayun,

Ring wiwekan Biyang Ida,

Ne ngawinang,

Ajin Ida raris mantuk,

Lintang nista Biyang Ida,

Mwastu panjak ngerimik sami.

 

19.                        Nuli tangkil ring Biyang Ida,

Maduluran,

Pikayunan dahat brangti,

Saha ngawentenang atur,

Uduh Biyang jengah tityang,

Reh tan sewawa,

Manah Biyang dot kasumbung,

Nyaratang tityang dados Raja,

Yukti Biyang nista weci.

 

20.                        Puput atur Sang Berata,

Nenten malih,

Menyantosang penyawis,

Tan pepamit Ida mlaku,

Pacang tangkil ring Sang Rama,

Manguningang,

Ajin Ida lina sampun,

Taler mangda kayun budal,

Mangentosin linggih Aji.

 

 

 

 

 

 

 

 

PUPUH GINADA

21.                        Tan critanen maring marga,

Sang Berata rawuh gelis,

Ring genah Sang Ramadewa,

Mangenjali saha matur,

Beli agung ampura tityang,

Rawuh tangkil,

Wenten sane uningang tityang.

 

22.                        Inggyan I Aji sampun lina,

Antuk banget ngayunin Beli,

Ledang mangkin beli budal,

Nudonang jagat jumneng Agung,

Taler banget lungsur tityang,

Antuk sisip,

Biyang tityang mapidabdab.

 

23.                        Puput atur Sang Berata,

Sang Rama raris nyawis,

Uduh adi Sang Berata,

Adi luwih turin Sadhu,

Rawuh Adi ketengah alas,

Ngalih Beli,

Nuturang unduk ring Ayodya.

 

24.                        Atur adi nto mekejang,

Using sandang selselang buin,

Pamekas indik Biyang Idewa,

Boya iwang nto twah patut

Nanging Beli saratang Idewa,

Apang mewali,

Nenten sida kelaksanayang.

 

25.                        Pituwi sedih Ida Sang Rama,

Mireng indik sedan I Aji,

Ida cengeh ngalilayang,

Nyuci muka Ida nyaru,

Mangelantur Ida ngandika,

Uduh Adi, mwali Adi ke Ayodya.

 

 

 

 

 

 

 

26.                        Buine Beli ada ngalas,

Tuwah witwit titah I Aji,

Suwenyane patbelas warsa,

Nto mawinan Adi de sungsut,

Pengacep beli wastu ledang,

Merabunin,

Maring jagat Ayodya Pura.

 

PUPUH SINOM

27.                        Adi mula lintang pradnyan,

Teleb maring Sastra Aji,

Dahat wibuh ring kagunan,

Mawinan pantes merabunin,

Ngemban panjak wadwa sami,

Mangda sida nemu rahayu,

Setata ngrajegang Dharma,

Yan adi tan kayun mangkin,

Sinah sampun,

Boya wenten kagunannya.

 

28.                        Yening kemad nyeneng Nata,

Nudonang panjak lan gumi,

Saenun beli maring alas,

Rawos beline tinutin,

Yening adi twah bhakti,

Mangda sampun salit kayun,

Jati adi memanggehang,

Mangentosin buat I Aji,

Nyeneng Agung,

Sampunang adi sangsaya.

 

29.                        Puput Ida mengandika,

Tan obah kayune jati,

Mangda sida nglaksanayang,

Ninutin pituduh Aji,

Sang Beratha durung misinggih,

Tumuli Ida malih matur,

Napike kalegan tityang,

Yening kari beli iriki,

Kari sungsut,

Tityang meweh ngemanahang.

 

 

 

 

 

30.                        Yening manut manah tityang,

Sane pinih duwur wantah Beli,

Mawinan beli patut ngemban,

Merabunin Ayodya Puri,

Wireh beli dahating luwih,

Asing musuh sida nungkul,

Sehananing Artha Berana,

Sane kadruwenang Bupati,

Boya patut,

Tityang ndiri mangodagang.

 

31.                        Awinan mantuk gelisang,

Mwali ke Ayodya Puri,

Dados pangemban ring jagat,

Dwaning tityang tambet jati,

Indik kautaman beli,

Kadi tukad Gangga iku,

Miwah beli kadi Surya,

Gunung Himawan mekadi,

Nenten patut,

Beli nyumbungang tityang.

 

PUPUH GINANTI

32.                        Sang Berata puput matur,

Sang Ramadewa raris nyawis,

Cutet bawos Beli Dewa,

Mantuk Adi sane mangkin,

Merabunin ring Ayodya,

Nudonang panjak wadwa sami.

 

33.                        Yening kemad Adi kasungsung,

Bakta ene Trumpah Beli,

Nanging abot nglaksanayang,

Mangda nulus nekeng hati,

Nganutin sesanan Ksatrya,

Apang setata kebaktinin.

 

34.                        Gagelaran dados Prabu,

Patut pisan Idewa uning,

Sekancan kecap Agama,

Nyandang ento piturutin,

Kardinin salwir wewangunan,

Punika ngawenang trepti.

 

 

 

35.                        Laksanane sane patut,

Wehin dana panjake sami,

Dharma Artha Kama muwah,

Yening akune puponin,

Sinah kagungane matingal,

Ento elingang pesan Adi.

 

36.                        Yen suba gagelaranne puput,

Lwihing pradnya kewastanin,

Rikala ngarepin Yuda,

Rawose bangras kardinin,

Nanging majeng ring Brahmana,

Ngandap kasor dreda bakti.

 

37.                        Waspadain Ipanjak iku,

Nyingak sane kawon becik,

Eda Adi mengampahang,

Panjakne patut swecanin,

Sane corah mangda kedanda,

Keto indike ngamong Gumi.

 

PUPUH DURMA

38.                        Munggwing punika, Prajurit Pamong Praja,

Waluya Alas wyakti,

Adi waluya Singa,

Menados pangemban,

Punika awinan becik,

Dahat ledang,

Saling jaga mangrenanin.

 

39.                        Katah bacakannya, sane ngawinang sengkala,

Pamong Prajane nibenin,

Manggeh Juru ne punika,

Manyelupsup ngawe ala,

Kedesa-desa memanesin,

Dusta katah,

Masliweran ngusak-asik.

 

40.                        Sang drowaka, lan sang corah kadi punika,

Patut pisan kebasmi,

Pamekasnya sane langgana,

Ngepet patin sang Nata,

Mangda stata waspadanin,

Tur pademang,

Mangda rahayu panggihin.

 

41.                        Paridabdab, manumadi ne ngawinang,

Manah sumbung ngliput wyakti,

Antuk mrasa wisesa,

Mrasa pradnyan wicaksana,

Kagungane malih mialangin,

Mwastu lipya,

Ring sesanan Ratu luwih.

 

42.                        Sapunika bawos Ida Sang Ramadewa,

Mapekeling ring I Adi,

Dahat luwih mautama,

Ledang kayun Sang Berata,

Titah Iraka kapisinggih,

Ngaturang suksma,

Mangenjali tur mepamit.

 

PUPUH ADRI

43.                        Crita mangkin Kanda kaping telu,

ARANYAKA KANDANE,

Sang Ramadewa nuli memargi,

Alas Nandaka katuju,

Ring margi raris kacunduk,

Ring Raksasa Wirada,

Rupa nyungsang batis baduwur,

Kabinawa ngaresresin,

Limane anggen mejalan.

 

44.                        Lintang galak kauk-kauk,

Egar manahnyane,

Polih tetadahan mangkin,

Nuli gelis nyagrep nyaup,

Nging Sang Rama yatna sampun,

Taler sang Laksmana,

Batis Raksasa Wirada iku,

Gelis kagamel sareng kalih,

Kakedeng tur masibakan.

 

PUPUH SEMARANDANA

45.                        Risampun I Wirada mati,

Sang Rama malih memarga,

Masusupan maring Alas,

Yogi sidhi kepangguha,

Maran Resi Saranggana,

Dahat ledang maring kayun,

Suwe sampun menyantosang.

 

46.                        Wireh Ida sampun uning,

Betara Wisnu mengawatara,

Iriki ring Mercapada,

Matemahan Sang Ramadewa,

Sane pacang sida ngruwat,

Mangda kamoksane pangguh,

Dwaning Ida lintang Utama.

 

47.                        Sang Resi ngandika aris,

Uduh Dewa Sang Ramadewa,

Angayu bagya isan bapa,

Bapa suba tatas nawang,

Pariindikan I Dewa,

Wantah Peragayan Wisnu,

Ngawetara Kejagat Skala.

 

48.                        Ruwat Bapa sane mangkin,

Mangda sida Moksapada,

Nanging ada besen Bapa,

Kemit Ida Resi Sutiksna,

Anggen Dewa Kanti sraya,

Ring pasraman dewa nglantur,

Ngelaksanayang Swadarma.

 

49.                        Pangruwatan kakawitin,

Olih Ida Sang Ramadewa,

Sang Resi Ngregepang yoga,

Antuk luwih maka ruwa,

Sang Resi raris sirna,

Ngungsi Moksapada sampun,

Sang Rama malih memaga.

 

50.                        Ring Pasraman kocap mangkin,

Genah Ida Resi Sutiksna,

Sampun kekemit Ida Sang Rama,

Dahat ledang Sang Begawan,

Nenten malih sumanangsaya,

Rikala pamuja nglantur,

Ring pengamuk watek raksasa.

 

 

 

 

 

 

 

PUPUH GINADA

51.                        Kocap Ida Sang Ramadewa,

Masesanjan sareng Rabi,

Maring wewidangan Pasraman,

Manglelipur murna kayun,

Sinambi mengalap sekar,

Nuli raris,

Ida sareng kalih meraryan.

 

52.                        Sang Rama nuli ngandika,

Uduh Adi jiwatman Beli,

Beli nunas pengampura,

Genah Adi nenten manut,

Sareng lara maring alas,

Patbelas warsi,

Metilar saking Puri Ayodya.

 

53.                        Beli Agung naweg tityang,

Sampunang Beli sangsaya malih,

Tityang nyadya mangiringang,

Pikayunan Beli Agung,

Yadin wenten maring alas,

Satya bhakti,

Maring Rabi sesanan tityang.

 

54.                        Dahat ledang Ida Sang Rama,

Dewi Sita Satya Bakti,

Nuli Ida malih ngandika,

Madak Adi Satya nerus,

Sareng Beli kesungkawan,

Ring wanadri,

Nglaksanayang Putra Sesana.

 

55.                        Wenten Yaksi Surpanaka,

Kocap nyingakin sang kalih,

Lintang asih saling tresna,

Surpanaka mwastu bingung,

Nuli digelis metilar,

Ngemaranin,

Genahe sane liyanan.

 

 

 

 

 

 

56.                        Raris kacingak Sang Laksmana,

Sarpanaka Kasmaran yukti,

Nanging kemad jroning manah,

Reh marupa Yaksi ipun,

Nuli raris nyuti rupa,

Dahat pangid,

Jangkep saha pepayasan.

 

PUPUH DANGDANG

57.                        Surpanaka, raris ngenampekin Sang Laksmana,

Dahat egar manahnyane,

Wireh sampun magentos warni,

Dados anak istri ayu,

Kulitnyane lumlum gading,

Rambutnyane tebel lantang,

Kenyumannya ngemken madu,

Kukunnyane rencek pisan,

Bangkyang rengkyang,

Susunnyane lintang nyangkih,

Mengasorang nyuh gading kembar.

 

58.                        Pejalane dahat mangedanin lemuh pisan,

Kadi sang mengigel Oleg,

Mwastu nudut sang mengaksi,

Sang Laksmana raris karumrum,

Antuk bawos nyunyur manis,

Sayan lami sayan lagas,

Sahasa ngosodang susu,

Ngambil tangan ngusap-usap,

Nenten kemad,

Wireh Smara mangliputin,

Tan jangkayan ngoda Laksmana.

 

59.                        Uduh jero, Anak lanang ngiring mangkin maledang-ledang,

Sampunang meneng dogen,

Tityang nyadya menagingin,

Indik patemon Smara tuhu,

Sang Laksmana tan mangiring,

Surpanaka sayan kasmaran,

Manggih Laksmana dahat bagus,

Nenten kemad sarwi niman,

Gregetan pisan,

Maduluran kedik ngrikik,

Reh Laksmana nenten nglawan.

 

60.                        Sang Laksmana raris ngadeg gelis tur ngandika,

Uduh jero anak jegeg,

Tatan pendah Widyadari,

Nanging solahe tan patut,

Nganistayang anak istri,

Naweg mangkin durus budal,

Anak lanang lyanan ruruh,

Anggen ngledangin manah,

Tityang kimud,

Nyingak anak istri jalir,

Tonden tawang laut tresna.

 

61.                        Surpanaka manahnyane dahat brangti ring Laksmana,

Nuli raris ngwalek,

Mirib jero anak bancih,

Ento ngranang jero kimud,

Nyengguhang tityang istri jalir,

Twah saja manut gatra,

Sang Laksmana truna ruyud,

Mawinan tan ngelah kurenan,

Sayang pesan,

Tan ngrasayang kalegan ati,

Melahan mati sepisanan.

 

PUPUH DURMA

62.                        Sang Laksmana dahat erang kewalekang,

Raris Ida mretyaksain,

Anak istri punika,

Wireh merasa sumandya,

Nuli raris kauningin,

Wantah raksasa,

Nyuti rupa anak istri.

 

63.                        Antuk kroda, katugel cunguh Surpanaka,

Nuli nangis jerit-jerit,

Mabur keakasa,

Mwali matemahan Raksasa,

Duh Laksmana jatma begig,

Kai Surpanaka,

Tusing nrima laksanan cai.

 

 

 

 

 

 

64.                        Nah antosang pangwales kaine rasayang,

Tusing buwungan cai mati,

Beli kai lakar ngwalesang,

Dahat sakti mandraguna,

Nah yatnain urip cai,

Surpanaka erang,

Raris mlaib ngerak ngeling.

 

65.                        Beli Trisirah, Sang Dusana lan Sang Kara,

Tulung tityang sane mangkin,

Jengah tityang keparikosa,

Olih ipun Sang Laksmana,

Cunguh tityang katugelin,

Kema enggalang,

Saratang apang Laksmana mati

 

66.                        Dahat kroda, Sang Trisirah lan arinnya,

Mwastu gelis ya memargi,

Ngalih Sang Laksmana,

Sang Rama sengeh pisan,

Baong Trisirah kapatitis,

Mwastu pegat,

Antuk panah DEDALI putih.

 

67.                        Sang Kara, Dusana, raris gelis ngewalesang,

Nanging taler ipun mati,

Sayan sedih Surpanaka,

Raris tangkil ring Rahwana,

Ngaturang indik belinnya mati,

Maduluran,

Tetangisan ngasih-asih.

 

PUPUH MASKUMAMBANG

68.                        Naweg tityang, Beli Agung kadi mangkin,

Tityang lintang erang,

Turin banget nandang sedih,

Keparikosa olih Laksmana.

 

69.                        Semaliha, cunguh tityang katugelin,

Napi puaran tityang,

Becikan sampun tityang mati,

Yan tan sida Beli ngwalesang.

 

 

 

 

70.                        Pangus pisan, Surpanaka matur uning,

Majeng risang Rahwana,

Mwastu Ida dahat brangti,

Mantuka ring Sang Laksmana.

 

71.                        Surpanaka, malih matur ngawewehin,

Beli Agung dong pirengang,

Sang Laksmana wenten ngemit,

Sang Ramadewa dahat sakti.

 

72.                        Munggwing Sang Rama, meduwe rabi Ayu luwih,

Maran Dewi Sita,

Mengasorang Widyadari,

Beli patut mangodagang.

 

73.                        Sang Rahwana, mengandika risang Ari,

Uduh Adi Surpanaka,

Yan keto de Adi sedih,

Beli lakar ngewalesang.

 

74.                        Lintang ogar, Surpanaka jroning ati,

Wireh Sang Rahwana,

Sampun sanggup manyentokin,

Memademang Sang Laksmana.

 

PUPUH PANGKUR

75.                        Mirib adi twara nawang,

Sang Rahwana, Ratu wibuh dahat sakti,

Sekama-kama maring kayun,

Ratun Dewa Sang Hyang Indra,

Lintang ngandup,

Maring beli turin nungkul,

Apa buin bantas I Rama,

Tusing bakal mamintulin.

 

76.                        Kurenannya Dewi Sita,

Bakal juang, anggon beli Prameswari,

Awinan Adi eda sungsut,

Beli sayang teken I Dewa,

Nah gebrasang,

Jagat Lengka pang sayan wibuh,

Jani beli lakar mejalan,

Adi ngantosang dini di Puri.

 

 

 

77.                        Pemargan Sang Rahwana,

Mengambara, makta Klewang murub ngendih,

I Candrahasa dahat kasumbung,

Risampune nampek segara,

Raris simpang,

Sang Marica ne karuruh,

Mangda ngiring pemargan Ida,

Ngungsi genah Nandaka Giri.

 

78.                        Prabu Rahwana mengandika,

Duh Marica, laut tuturang unduke nguni,

Duke gelah mangutus,

Nureksain alas Nandaka,

Tur ngrusakang,

Pasramannya para wiku,

Kekenken ento pikolihnya,

Nah lautang tuturang jani.

 

PUPUH SINOM

79.                        Kocap mangkin I Danuja,

Ika ajeng Lengkapuri,

Arannyane Sang Marica,

Merasa banget ajerih,

Pacang ngawentenang piuning,

Antuk titah Ida Sang Prabu,

Inggih Ratu Sang Rahwana,

Ampura Ratu tityang riyin,

Jagi matur,

Paindikan sane lintang.

 

80.                        Dahat meweh lampah tityang,

Ngaksi genah sang Metili,

Anging sampun cunduk tityang,

Maring tengah wana sripit,

Nanging wenten sane ngemit,

Sareng rwa tityang pangguh,

I Ramadewa ne kapertama,

Laksmana kaping kalih,

Sampuniku,

Sane kapikantenang tityang.

 

 

 

 

 

 

81.                        Wyakti lacur lampah tityang,

Kantin tityang padem sami,

Antuk I Rama Laksmana,

Dahat wikan miwah sakti,

Kebukan tityang mengarepin,

Baan pascatne magebug,

Gegesonan melaib tityang,

Yan tan kenten tityang mati,

Inggih ratu,

Cutet ajerih manah tityang.

 

82.                        Wawu puput atur Sang Mrica,

Prabu Lengka nimbal brangti,

Uduh cai pakon nira,

Nguda keto baan mamunyi,

Jengah nira maminehin,

Atur cai nyunjung satru,

Prade keto atur paman,

Lawan nira midep weci,

Nora manut,

Ring darmika dadi duta.

 

83.                        Tan maidep yuktin nira,

Lawan cai mambek weci,

Yan amonto eman nira,

Cai nora bisa nampi,

Satsat cai Asu sangkil,

Mada-mada solah satru,

Tan paguna dadi nira,

Ngandel cai dadi patih,

Pinih patut,

Mintar cai saking Lengka.

 

84.                        Ento buin sang Tataka,

Balan nira mawak istri,

Kematiang ban I Rama,

Kasujatiannya tan pesakti,

Pantes cai tan ngemanin,

Pragat I Rama cai jungjung,

Muwah I Kara Trisirah,

I Rama manah wastu mati,

Dahat latuh,

Ambek cai kapin nira.

 

 

 

85.                        Yah Marica patih dusta,

Iki bendun nira tampi,

Apan cai mambek tungkas,

Satru anggen cai kanti,

Raris Ida ngunus keris,

Warnin Ida barak murub,

Nuli nuding Sang Marica,

Sang Marica nunas urip,

Singgih ratu,

Ampurayang sisip tityang.

 

86.                        Pituhune manah tityang,

Saking bakti majeng Gusti,

Nenten pisan midep langah,

Mariceda linggig Gusti,

Jalaranne tityang eling,

Dados bala Lengka lacur,

Kalih tityang ne rumasa,

Lungguh Gusti ngamertanin,

Wastu hidup,

Kalih ngangge pakon muka.

 

PUPUH MASKUMAMBANG

87.                        Naweg ratu, atur tityang ampura ugi,

Yukti manah tityang,

Nyadya saking ngewangsitin,

Lungguh gusti nyakra jagat.

 

88.                        Tityang nunut, kedarmikan Sang Mematih,

Misinggihin Dharma,

Nganggen dasar mela gusti,

Ngardi jagat mangda dangan.

 

89.                        Prade ratu, mangkin nenten salit arti,

Maring atur tityang,

Saking midep Satya Bhakti,

Mabelapati maring jagat.

 

PUPUH DURMA

90.                        Singgih ratu, mangkin wenten nayan tityang,

Prade ratu tan misisip,

Tityang praya ne masunglap,

Dados kidang bulu emas,

I Ramadewa meseh Gusti,

Lawan Arinnya,

Pasahang tityang Ri Sang Dewi.

91.                        Sampun pasah, I Rama maring Sang Sita,

Laksmana kaping kalih,

Sakita karep cokor I Dewa,

Nora malih nundung tityang,

Marica saking Lengka Puri,

Sang Rahwana,

Ledang kayune mangkin.

 

92.                        Raris ngucap, Prabu Lengka ring pakonnya,

Sirna kayune brangti,

Yening keto atur paman,

Lautang suba mejalan,

Sang marica matur singgih,

Tur memarga,

Maring enu tan kewarna.

 

93.                        Suban rawuh, Lumakune maring alas,

Sang Marica ngentos warni,

Dados Kidang kekawian,

Nuli nampekin Sang Sita,

Kocap Ida Sang Metili,

Dudut cita,

Ngaton bulun kidang luwih.

 

94.                        Tur nganengneng, Dyah Sita mesesuryan,

Ngawas kidang ne nampekin,

Kancit nyolot kayun Ida,

Nuduk anggon kekampuhan,

Tur matur ri sang ngemit,

Raka Nata,

Tulung tityang sane mangkin.

 

PUPUH GINADA

95.                         Prade tuhu beli eman,

Kadi pajar duke nguni,

Duk ngarumrum ragan tityang,

Ngarsa tityang nganggen wadu,

Ubayan beli duk pidan,

Risang Dewi,

Beli sanggup ngemban tityang.

 

 

 

 

 

 

96.                        Durus mangkin tulung tityang,

Ngejuk kidang iku beli,

Sangkan pakon nora tulak,

Ring Arine ngandika alus,

Uduh Adi Laksmana,

Sane mangkin,

Adi ngoyong di pasraman.

 

97.                        Ngemit I embok Dewi Sita,

Oja pisan tinggal Adi,

Rawuhing ngemit di Pasraman,

Adi tinggal beli dumun,

Beli praya ngejuk kidang,

Nuli nyawis,

Arin ida mangiringang.

 

98.                        Sang Rama raris mangkat,

Kadi pakon Sang Metili,

Sampun nampek ring I Kidang,

Tan jangkayan Ida nyaup,

I Kidang becat ya menyelinar,

Tur nyengkerin,

Sada ipun mangejohang.

 

99.                        Dahat wirang kayun ida,

Raris nutug saking wuri,

Suban doh saking pasraman,

I Kidang ngeka naya ditu,

Mapi-mapi ne kalesonan,

Sada nyilib,

Ring tarune sane ramya.

 

100.    Nuli Ida mantang langkap,

Antuk wirang ne tan sipi,

Tur kalepas panah Ida,

I Kidang nyerit nandang tatu,

Lambung kiwan ipun bedah,

Bungsang-bangsing,

Bahan sakitne kalintang.

 

 

 

 

 

 

 

101.    Makire puput iya I Kidang,

Bungsang ipun jerat-jerit,

Pajarnyane ngawe ala,

Nunas urip tulung-tulung,

Ngame-ame Laksmana,

Sang Matili,

Ketanggama miarsayang.

 

102.    Apan pajar Sang Rama,

Naring kayun minta urip,

Raris Ida mangandika,

Ring Ipennya banban alus,

Adi bagus Laksmana,

Nguda nengil,

Adi mireng ling I Raka.

 

103.    Yan amonto pireng embok,

Pajar I Beli jerat-jerit,

Ngame-ame aran I Dewa,

Minta urip tulung-tulung,

Minab Ida keni ala,

Sane mangkin,

Kema tulung Swamin embok.

 

104.    Buat pajar emboke busan,

Nunden tityang menyagjagin,

Nora lasya manah tityang,

Ninggal embok tan petangguh,

Mwastu purun tityang nulak,

Antuk eling,

Lawan wangsit Ida ring tityang.

 

105.    Saking sarat pajar Ida,

Ngewangsitin tityang tuni,

Apan tityang saking satya,

Ngemit embok saking cucud,

Sampunika jalarannya,

Sangkan mangkin,

Pakon embok tan kiringan.

 

 

 

 

 

 

 

106.    Singgih embok Dyah Sita,

Atur tityang becik sisik,

Pang tan embok salit nanggal,

Atur tityang saking tuhu,

Napi malih tityang pedas,

Lawan indik,

Kawisesan belin tityang.

 

107.    Oja embok sumanangsaya,

Tur ajerih sane mangkin,

Muwah mireng ling punika,

Pang tan ngawe sakit kayun,

Dening tityang Laksmana,

Tatas uning,

Ring sakti suwamin embok.

 

108.    Yening maring rananggana,

Ida nora pacang mati,

Oja embok nganistayang,

Kawisesan I Beli Agung,

Muwah embok sampun wikan,

Kapin indik,

Ujar jagat ne samian.

 

109.    Kojar saktin maring rana,

Twah swamin embok ring bumi,

Lintang kasub mawisesa,

Nanggap satru nora kengguh,

Siksa dumun atur tityang,

Tuna luwih,

Gung ampura tityang embok.

 

110.    Malih manah tityang,

Ngitung sesan Ida I Beli,

Doh para ragan Ida,

Lilih ngejuk kidang aukud,

Yening tityang maitungan,

Ling puniki,

Janten pajar kekawian.

 

 

 

 

 

 

 

PUPUH DURMA

111.    Sangkan ipun, jerit-jerit pireng embok,

Nawi ipun nandang sakit,

Keni panah Belin tityang,

Nglalu bayune praya pejah,

Embok oja walang hati,

Jantos Ida,

Ring pasraman rawuh I Beli.

 

112.    Janten sampun, rawuh Ida makta kidang,

Pang tan keni sisip,

Dening ana ling irika,

Sada gati lawan tityang,

Kepakon ngemit embok iriki,

Di Pasraman,

Bahan manah satya bhakti.

 

113.    Dyah Sita, raris nanggal ling ne kawon,

Lawan ragan sang makemit,

Laksmana ipen embok,

Nguda keto ban mepajar,

Rasa kengguh embok ngitungin,

Ling I Dewa,

Bahan nembe nulak mangkin.

 

114.    Reh ipidan, Adi anggen embok Ipah,

Lintang satya lawan I Beli,

Kancit mangkin swamin embok,

Tulung-tulung katiben ala,

Nguda adi tan melanin,

Sujatinnya,

Idep adi luwih tuwi.

 

115.    Lintang dusta, idep cai Laksmana,

Nora nganggen Dharmaning Ari,

Druwaka idep cai me Ipah,

Madakang Belin cai apang seda,

Sida cai manresnanin,

Langgah pisan,

Nirdon tuwi ulah cai.

 

 

 

 

 

 

116.    Miwah cai, salah tarka Laksmana,

I Sita boya Istri jalir,

Muwah nora mambek sato,

Busan-busan meangkepan,

Malih idep Sang Matili,

Prade rangda,

Nora malih ngalih laki.

 

117.    Prade Ida, Sang Hyang Widhi tan sweca,

Swamin nira durus mati,

Tan paguna urip I Sita,

Nandang lara maring alas,

Iki baong nira mangin,

Kaat putungan,

Nira numut swami mati.

 

118.    Kapin cai, I Sita nora ngaturang awak,

Keto ujang Sang Matili,

Ngawanan Ipah di Pasraman,

Laksmana kengguh nanggap,

Buat ujar Sang Metili,

Dahat kaon,

Nyengguh Ipah mambek weci.

 

PUPUH SINOM

119.    Laksmana malih aris nanggal,

Nguda keto embok mamunyi,

Rasa remuk anggan tityang,

Solah embok midep salit arti,

Yan tan sida kedagingin,

Nora ngitung iwang patut,

Anging sisip katon dharma,

Basa dharma tanggap sisip,

Sampun iku,

Mambek nanggap atur tityang.

 

120.    Suban mangkat Laksmana,

Dyah Sita linglung paling,

Raris Ida murna cita,

Bahan bingungne tan sipi,

Nuli Ida ne memargi,

Murna cita ngalap santun,

Sedek ngepik-ngepik sekar,

Prabu Lengka ngerawuhin,

Nganggo wiku,

Pangguh katon kadi pandita.

121.    Putih wajahnyane ngentak,

Manik banyu minekadi,

Alus manis cacingaknya,

Manting-anting magunitri,

Nuli nesek ri Sang Dewi,

Tur atanya dabdab alus,

Duh dewa luwihing warna,

Angob Bapa mangiwasin,

Nembe antuk,

Ngaton anak ayu utama.

 

122.    Puput tuwi rupan I dewa,

Tan petanding maring gumi,

Maring alas katon bapa,

Mawak wadu mengandiri,

Yukti peragayan Seri,

Bapa ne jani memangguh,

Yan tan sisip antuk narka,

Janten dewa ada ngemit,

Sangkan purun,

Ring wana ne tan paruwang.

 

123.    Nyelang bapa matur tanya,

Sira yuktine mangiring,

I dewa dini ngalap sekar,

Nunggal maring alas pingit,

Dening jwa mawak Istri,

Muwah ayu ne kalangkung,

Wastu nudut manah bapa,

Bahan nembene mangguhin,

Anak wadu,

Ayu rupa kadi I dewa.

 

124.    Keto naling Sang Rahwana,

Yukti rupa maka Yati,

Ri Sang Dyah Dewi Sita,

Ling ne pangus ngawi-awi,

Sada nesek mangulingling,

Uli suku kayang ke duwur,

Ajerih kayun Dyah Sita,

Sampun merasa maring ati,

Keajum-ajum,

Olih anak mangguh jada.

 

 

 

125.    Ulun hatinnyane runtag,

Merasa lawan raga ndiri,

Pacang niben ala Nata,

Raris nanggal ling ne aris,

Naweg atur tityang riyin,

Dharma sisip ampura ratu,

Atanya ratu nora simpang,

Tityang wantah ana ngemit,

Sangkan purun,

Maring alas ngalap sekar.

 

126.    Mangkin ratu apang wikan,

Ri sang ngemit tityang iriki,

Ramadewa bisekannya,

Laksmana ming asiki,

Iku Ipen tityang tuwi,

Lawan tityang lintang cucud,

Ramadewa swamin tityang,

Sane kasub maring gumi,

Sampuniku,

Maka yuktin indik tityang.

 

127.    Mungguing ida swamin tityang,

Sane kasub sakti ririh,

Ida Putran Dasarata,

Ne rumaga Satrya jati,

Anging wiku tapa sami,

Swamin tityang ngemit iku,

Mejalaran antuk dharma,

Kedharmikan nyakra werdi,

Ngardi adung,

Cakra bala ne ring jagat.

 

PUPUH GINADA

128.    Asing satrun wiku tapa,

Olih Ida lampus sami,

Muwah Sang Parasurama,

Sane maring rana puput,

Swamin tityang mejahang,

Antuk begig,

Ngusak-asik wiku tapa.

 

 

 

 

 

129.    Kalih watek Yaksa Buta,

Sing ngarepang puput sami,

Keni panah swamin tityang,

Indayang ja aksi ratu,

Bangken ipun I Danuja,

Pasulangsit,

Irika ring tepi pasraman.

 

130.    Lampah I ratu saking bagia,

Mangguh tityang ne iriki,

Yening ratu ledang simpang,

Ngiring ratu mrika dumun,

Apang ratu saking wikan,

Sane mangkin,

Lawan Ida swamin tityang.

 

131.    Prabu Lengka alon nual,

Ngatur ayah sampun uning,

Lawan Ida Dyah Sita,

Anging kari mangguh wiku,

Duh Sang Sita lwihing warna,

Maka yuktin,

Bapa sampun tatas wikan.

 

132.    Yuktin I Rama wang wimuda,

Jalaran pongah nyakra werdi,

Tan paguna nyeneng nata,

Ratu tan pedasar lud,

Sami Arine ngasorang,

Sangkan mangkin,

Wenten ring tengahing alas.

 

133.    Jalarane madeg nata,

Bahan anak pinih kelih,

Apa keman jwa memanjak,

Kapin I Rama anak lacur,

Mangkin bapa mitatasang,

Maka indik,

Nata ne tan kirang apa.

 

 

 

 

 

 

 

134.    Sapetinget ragan bapa,

Olih eling rawuh mangkin,

Ngantos bapa mawak werda,

Mawak wasmane kawuwus,

Muwah ratune kaucap,

Saktin ririh,

Ne muwah wirya maring jagat.

 

135.    Sejawaning Prabu Lengka,

Sang Rahwana ne pepasih,

Mangkin dewa apang pedas,

Sang Rahwana Bapa sampun,

Mangkin Adi apang wikan,

Ring sayuktin,

Beli Wiku sesunglapan.

 

136.    Yuktin Beli Sang Rahwana,

Saking nyadia ngalih Adi,

Beli sampun Prabu Lengka,

Ratu ne tan nemu kengguh,

Sugih nora kuwangan apa,

Muwah pipis,

Nora sida ban ngitungin.

 

137.    Oja maring lemah pada,

Eda buat sugih beli,

Rawuh maring Siwapada,

Sugih beli kari ngunggul,

Buat betara wis Rahwana,

Olih beli,

Sane ngebug wastu kalah.

 

138.    Buat purin beline kucap,

Apang adi tatas uning,

Ring Alengka tepining samudra,

Luya kantin I sasih agung,

Ratna pariyatna ngaran,

Ngulangunin,

Antuk katah mas sasocan.

 

 

 

 

 

 

 

139.    Iku adi muah sayang,

Kancan daging purin beli,

Asing adi ne karsayang,

Suba jangkep ada ditu,

Oja adi walang manah,

Kadi mangkin,

Nanggap naling Sang Rahwana.

 

140.    Kaduk beli sedeng becat,

Muwah saktine tan kadi,

Kalih muang kayun I dewa,

Nganggen beli Swari suwun,

Swamin adi I Ramadewa,

Nah tinggalin,

Iku raja tan pedasar.

 

141.    Keto pajar Prabu Lengka,

Ngajum Ida Sang Metili,

Dyah Sita tanpa ngucap,

Prabu Lengka sayan bingung,

Tur menyaup marikosa,

Sang Metili,

Jerat-jerit nunas ica.

 

PUPUH SEMARANDANA

142.    Dewi Sita crita mangkin,

Duk kepandung Sang Rahwana,

Jerat-jerit metangisan,

Nanging tan sida ngelawan,

Sang Rahwana mengambara,

Dewi Sita sarwi kapundut,

Kebakta ke Lengkapura,

 

143.    Sita nyelsel jroning hati,

Antuk nundung Sang Laksmana,

Manulame tan pegatan,

Uduh Adi Sang Laksmana,

Saja buka atur I dewa,

Mwastu embok keni pakewuh,

Kepandung olih Raksasa.

 

 

 

 

 

 

144.    Ampura pesan embok adi,

Embok sisip ring I dewa,

Adi pradnyan wicaksana,

Tatas maring panyengkala,

Wit sangkaning pangindrajala,

Twah embok mula punggung,

Tulungin embok jwa enggalang.

 

145.    Dewi Sita kala nangis,

Sang Jatayu miragiang,

Raris gelis dane mlesat,

Ngepung lampah Sang Rahwana,

Tan carita maring marga,

Kocapan sampun kacunduk,

Maring raksasa Rahwana.

 

146.    Sang Jatayu dahat brangti,

Kala nyingak Sang Rahwana,

Duh Rahwana momo corah,

Tusing pesan nglah pengrasa,

Mandung anak tanpa dosa,

Kai madan Sang Jatayu,

Sane lakar ngawirangang.

 

147.    Yan twah saja cai sakti,

Sang Jatayu lawan mesiat,

Mwastu kroda Sang Rahwana,

Cai Jatayu langgah langgana,

Nantang baya ring Rahwana,

Sang kalih mayuda nglantur,

Sami pradnyan mawisesa.

 

148.    Pascat Jatayu makelid,

Nyander nyotot krura pisan,

Sang Rahwana dahat kebukan,

Antuk nyingal Dewi Sita,

Kanin rahat getih muncrat,

Kaoyot olih Jatayu,

Sayan kaleson Sang Rahwana.

 

 

 

 

 

 

 

149.    Dewi Sita runtuh raris,

Tambis-tambis Ida seda,

Yan tan Jatayu ne nyingglak,

Nuli malih mangambara,

Sayan kroda Sang Rahwana,

Sang Sita keni karebut,

Raris ngunus Candrahasa.

 

150.    Sang Jatayu katutburi,

Raris kampidnya kasempal,

Karebut malih Dewi Sita,

Jatayu tiba ring tanah,

Kandapan jroning payudan,

Sang Rahwana malih mabur,

Pacang budal kalengkapura.

 

151.    Sang Jatayu dahat luwih,

Dyastun kanin rahat pisan,

Ngelawanin dane nyantosang,

Rawuh Ida Sang Ramadewa,

Antuk eling masewitra,

Sareng Ajin Ida dumun,

Puput Aranyaka Kanda.

 

JAYENDRA

152.    Kiskinda Kanda katur,

Ngelantur caritane malih,

I Kidang sampun lampus,

Keni panah Sang Ramadewa.

 

153.    I Kidang puniku,

Kocap dados raksasa mwali,

Mawinan Sang Rama sungsut,

Eling raris ring pangindra jala.

 

154.    Sang Laksmana saget rawuh,

Meswabhawa lintang sedih,

Tumuli gelis matur,

Indik bawos Dewi Sita kauningang.

 

155.    Uduh Adi bagus,

Ciri kawon ene Adi,

Sangkaning wiwekan I Satru,

Ya I Kidang wantah sasunglapan.

 

 

PUPUH GINADA

156.    Antuk mrasa kesangsayan,

Sang Ramadewa mwali gelis,

Ngemaranin Dewi Sita,

Kagyat Ida kala rawuh,

Dewi Sita sampun ical,

Sayan sedih,

Pikayunan Sang Ramadewa.

 

157.    Uduh adi Dewi Sita,

Dija Adi magenah mangkin,

Beli kena pangindra jala,

Ya I Kidang suba lampus

Mwastu Adi kena bencana,

Uduh Adi,

Enggalang Adi malipetan.

 

158.    Suwe Ida menyantosang,

Nanging Dewi Sita tan mewali,

Sang Rama malih nyusup alas,

Kacingak kampid Jatayu,

Keparna mlaibang Sang Sita,

Nuli brangti,

Ida Sang Ramawijaya,

 

159.    Antuk banget krodan Ida,

Mwastu prerain Ida ngendih,

Tur ngamedalang kapurusan,

Anggan Ida krasayang kebus,

Nuli nyerit kadi Singa,

Dahat ngaresresin,

Raris Ida mengandika,

 

160.    Enyen bani parikosa,

Marikosa rabin gelah,

Bas kaliwat nista corah,

Mirib I Rama kaden takut,

Teken musuh mawisesa,

Enggalang mai,

Centokin jani I Rama.

 

 

 

 

 

 

161.    Sang Hyang Surya ngardi lemah,

Sang Hyang Indra ane sakti,

Ane bani ngawirangang,

Nah mai I Rama rebut,

Gelah bisa matmahan Kala,

Memati-mati,

Saluwir saratang kasidan.

 

162.    Sapunika wecanan Ida,

Sang Laksmana gelis ngebakti,

Ngandegang krodan Sang Rama,

Ngandap kasor raris matur,

Beli Agung ampura tityang,

Mapekeling,

Mangda Beli nenten salit arsa.

 

PUPUH GINANTI

163.    Janten jagat pacang erug,

Antuk kawisesan Beli,

Beli yukti Purusotama,

Pengawetaran Sang Hyang Ari,

Nanging boya brangtine bwatang,

Wantah sesanan Ksatrya Luwih.

 

164.    Paridabdab sane patut,

I Satru mangkin patut basmi,

Sane setata ngarubeda,

Makhawinan beli patut eling,

Sampunang menggah piduka,

Mangda tan kebawos sisip.

 

165.    Sapunapi pikenoh bendu,

Yan punika tuwutang beli,

Wantah ngardi cacad ring jagat,

Semalihe jagate tan sisip,

Wantah bingung Beli kalintang,

Antuk banget nandang sedih.

 

166.    Becikan beli mapikayun,

I embok ngiring rerehin,

Mogi Sweca Ida Betara,

Embok Dewi sida panggih,

Mangda wusan beli sungkan,

Kayun Beli mwali suci.

 

 

167.    Puput Sang Laksmana matur,

Mwastu ledang Sang Rama mangkin,

Raris ngelantur memarga,

Ngererehin Sita Dewi,

Nanging durung sida pangguha,

Yadyan genah rungka klintangin.

 

168.    Crita kaksi Sang Jatayu,

Wyakti lintang ngegawokin,

Kadi gunung kala kacingak,

Rupannyane kabinawa,

Kaparna Jatayu ne mlaibang,

Sang Ramadewa malih brangti.

 

169.    Sang Jatayu gelis matur,

Inggih ratu lintang luwih,

Sampunang ratu sumandya,

Sang Jatayu tityang yukti,

Uning tityang ratu byapara,

Antuk kicalan Sita Dewi

 

ANUSTUB WISAMA MATRA

(RARE BINAL)

170.    Naling nirang Maha Paksi,

Manembah Sang Raguttama,

Sirang Jatayu Karunnya,

Mitra kasih nirang Bapa.

 

171.    Sira glana kanin tibra,

Tetapi maurip sira,

Alah umer sirang Rama,

Sangka ri dredaningasih,

 

172.    Teka pwa sira Si Rama,

Mojar ta sira ring musuh,

Huwus mojar pejah sira,

Sawetning tibraning kanin.

 

173.    Sapejah nirang murcana,

Sang Rama menangis sira,

He Jatayu Maha dibya,

Wenang daraka ring urip.

 

 

 

 

174.    Sangkaryasih ta mamitra,

Bapangku kalulut temen,

Tumuli teka ring Putra,

Aho dibyantaka he kaga.

 

175.    Sedeng tat mahurip nguni,

Bapangku mahurip hidep,

Ripejah ta kunang mangke,

Menya kawuh uwuh temen.

 

176.    Huwus Sang Rama menangis,

Tunu wangke ikang mariuk,

Masoca ta maweh pinda,

Muwah lunga siranusup.

 

177.    Ana Raksasa kascarya,

Bahunya medawa temen,

Malapa Meharep mangse,

Ya pinangguh nirengalas.

 

178.    Musuh ning sato yeng dangu,

Dirgabahu ngaranika,

Ya ta mangse sira krura,

Runusyang kadga tiksna ya.

 

PUPUH DURMA

179.    Kocap mangkin, kasempal liman Sang Raksasa,

Mwastu pegat paremangkin

Nuli ebah maring tanah,

Ical raris rupan raksasa,

Kejatimula ya mwali,

Marupa Dewa,

Tejannyane murub ngendih.

 

180.    Selanturnya, mapitaken ring Sang Rama,

Indik parab tatujon malih,

Sang Rama raris midartayang,

Wastan tityang Ramadewa,

Nyusup alas kadi mangkin,

Wireh kicalan,

Rabin tityang Sita Dewi.

 

 

 

 

 

181.    Munggwing jero, sapasira sujatinnya,

Macihna Dewa mautami,

Napike molih pengaptin tityang,

Miwah I Satru sida kasoran,

Sang ketakenin raris nyawis,

Sujatinnya,

Tityang putran Betara Seri.

 

182.    Sakewala, tityang iwang melaksana,

Antuk nglangkahin Sang Maharsi,

Kala tityang ngalila cita,

Raris kepastu dados Raksasa,

Idewa sida ngruwat mangkin,

Tetujon dewa,

Pastika pacang kapikolih.

 

183.    Rabin Idewa, kepandung baan Sang Rahwana,

Maring Lengka merabunin,

Ratu corah nista dama,

Mawinan iya patut matiang,

Nging sadurunge ngelaksanain,

Tulung punika,

Sang Sugriwa maka nami.

 

PUPUH GINADA

184.    Sang Sugriwa punika,

Patut anggen dewa kanti,

Maring gunung Resyamuka,

Lintang Darmika turin Sadhu,

Nanging mangkin kesangsaran,

Wit Sang Bali,

Ngarebutin Dewi Tara.

 

185.    Sang Subali lintang corah,

Nanging ipun dahat sakti,

Awinannya patut matiang,

Mambek nyapa kadi aku,

Puput bawos sang meraga Dewa,

Mlesat raris,

Mwali mantuk ke Swargaloka.

 

 

 

 

 

 

186.    Sang Rama nglantur memarga,

Nyusup maring alas sripit,

Kagyat Ida kala nyingak,

Anak Istri lintang Sadhu,

Nging warninnya selem pisan,

Kadi mangsi,

Kulit kayu anggena wastra

 

187.    Pageh kukuh nangun Brata,

Sang Rama nuli nakenin,

Sang Tapasi naweg tityang,

Napi krana lintang puguh,

Nangun Brata Semadi Tapa,

Dahat luwih,

Mangastawa Hyang Iswara.

 

188.    Sang Tapasi aris nanggal,

Wastan tityang Sang Sawari,

Suwe tityang nyantos Idewa,

Pengawetaran Sang Hyang Wisnu,

Wireh tityang keni Sapa,

Duke riyin,

Olih Ida sang Hyang Rudra.

 

189.    Durus usap muwan tityang,

Mangda kejatimula mwali,

Sang Rama gelis ngusap,

Premangkin purna wuwus,

Sang Sawari raris ical,

Sang Rama raris,

Ngungsi gunung Resyamuka.

 

PUPUH SEMARANDANA

190.    Sang Sugriwa crita mangkin,

Maring gunung Resyamuka,

Nandang sedih kesangsaran,

Reh ngayunin Rabin Ida,

Sang Subali ne mlegandang,

Lintang ajerih pacang mepagut,

Sang Subali mawisesa.

 

 

 

 

 

 

191.    Banget pisan sungsut sedih,

Dugi Ida metangisan,

Ngajap-ajap rabin Ida,

Uduh Adi Dewi Tara,

Eda Adi mengobetang,

Ene suba madan tuduh,

Beli pasah ring Idewa.

 

192.    Nanging jantos dumun Adi,

Yening sampun panumaya,

Beli pacang ngewalesang,

Sang Bali janten kasoran,

Wireh dahat letuh corah,

Becikang dewa ring kahyun,

Beli pacang ngalih sawitra.

 

193.    Sang Sugriwa nyusup raris,

Kairingan wadwa Wenara,

Nuli Ida mangandika,

Uduh nanak marutsuta,

Jani suba panumaya,

Ida Sang Rama sampun rawuh,

Kema jani pendak Ida.

 

194.    Sang Hanoman lintang bhakti,

Ngiring titah Sang Sugriwa,

Mepamit raris memarga,

Ngarerehin Sang Ramadewa,

Maring alas Resyamuka,

Keakasa mlesat mabur,

Dahat kabinawa pisan.

 

PUPUH PANGKUR

195.    Sang Hanoman mengambara,

Mangkungkulin, Resyamuka lintang sripit,

Ngawetuang angin nglinus,

Wireh dane Bayuputra,

Mawisesa, turin sida sapekahyun,

Tanasuwe raris kacingak,

Sang Ramadewa kala memargi,

 

 

 

 

 

 

196.    Gelis tedun Sang Hanoman,

Sang Ramadewa nuli ketampekin,

Saha gelis dane matur,

Inggih dewa ampura tityang,

Sang Hanoman, sapasira nekawuwus,

Turin napi babuwatan,

Ke Resyamuka rawuh mangkin.

 

197.    Saking nguni sampun kaloktah,

Resyamuka genah lintang madurgami,

Sang Hyang Siwa tan purun rawuh,

Nanging dewa sareng ruwa,

Janten utama, mewastu presida mangkin rauh,

Durus mangkin pidartayang,

Mangda tityang tatas uning.

 

PUPUH GINANTI

198.    Sang Hanoman puput matur,

Sang Ramadewa raris nyawis,

Tityang putran Sang Dasarata,

Saking Ayodya Negari,

Nanging tityang kaduhkitan,

Katitah nyusup Wanadri,

 

199.    Wenten wiku lintang kasub,

Sang Sutiksna maka nami,

Irika tityang madunungan,

Pasraman Ida tityang ngemit,

Kausak-asik olih raksasa,

Mangkin sampun padem sami.

 

200.    Nanging tityang lintang lacur,

Rabin tityang Sita Dewi,

Kepandung ban Sang Rahwana,

Mawinan tityang rawuh mriki,

Sareng adin tityang Laksmana,

Ngarerehin Sita Dewi.

 

201.    Sang Hanoman malih matur,

Singgih Ratu lintang luwih,

Titynag dutan Sang Sugriwa,

Mendak ratu kadi mangkin,

Palungguh Ratu kanggen sawitra,

Ledang ratu manywecanin.

 

 

202.    Rabin Idane karebut,

Olih ipun Sang Subali,

Sane corah nista dama,

Nanging ipun dahat sakti,

Singgih Ratu Btara Rama,

Ngiring mangkin jwa mamargi.

 

PUPUH SINOM

203.    Angayubagya Ratu tityang,

Antuk ledang ngerawuhin,

Kengin banget ampurayang,

Tityang katunan sami-sami,

Durus ratu suwecanin,

Belin tityang manggeh satru,

Somah tityang kaplegandang,

Jagat taler karebutin,

Sapuniku,

Atur dane Sang Sugriwa.

 

204.    Sang Ramadewa raris nanggal,

Uduh dewa Sugriwa luwih,

Manah nira gargita pisan,

Sida kacunduk kadi mangkin,

Taler nira sareng sedih,

Nanging sedereng ngelantur,

Pasawitrane  becik dabdabang,

Mejalaran Upesaksi,

Mangda manut,

Ring pengawit masawitra.

 

205.    Kocap mangkin Geni Homa,

Upacara Upasaksi,

Pasawitran Sang Karuwa,

Dahat ledang Ida mangkin,

Arepe saling tresnain,

Upacara sampun puput,

Sang Rama raris ngandika,

Banban alon nyunyur manis,

Sugriwa bagus,

Pireng mangkin lampah nira.

 

 

 

 

 

 

206.    Rabin nira Dewi Sita,

Istri ayu mautami,

Kepandung ban Sang Rahwana,

Prabu Lengka dahat weci,

Mwastu nira lara mangkin,

Kaliput manahe bingung,

Patut Idewa lawan nira,

Awinan dewa suwud sedih,

Pinih patut,

Nayane jalan dabdabang.

 

207.    Munggwing Sang Bali punika,

Sane stata ngusak-asik,

Patut tibakin Pidanda,

Mogi Hyang Widhi nywecanin,

Rikala Idewa magutin,

Kengin Idewa eda bingung,

Pikayunane nenten obah,

Manira stata pacang ngabih,

Yantan puput,

Idewa tusing ja katinggal.

 

PUPUH DURMA

208.    Sang Sugriwa, raris matur risang Rama,

Ampura tityang kadi mangkin,

Boya sangkan mengandapang,

Palungguh ratu mawisesa,

Sujatinnya Sang Subali,

Sakti pisan,

Tan pesama ring Jagat teri.

 

209.    Reh punika, manah tityang ajrih pisan,

Sang Mahasura duke riin,

Maka satrun Sang Hyang Indra,

Sane sakti mandraguna,

Kematiang baan Sang Bali,

Sapunika,

Mangda ratu ngeyatnain.

 

210.    Sang Ramadewa, ngambil langkap tur ngandika,

Sang Sugriwa nah cingakin,

Ento ada Don Ental,

Pepitu lepihannya,

Mangkin nira mapatitis,

Betel samian,

Sang Sugriwa angob yukti.

211.    Sampun purna, wiwekane kedabdabang,

Kocap mangkin Ida memargi,

Ngemaranin Gua Kiskinda,

Sane dahat madurgama,

Sang Sugriwa raris nangtangin,

Mangda medal,

Kapiraja Subali.

 

212.    Lintang kroda, Sang Subali tur ngandika,

Yah Sugriwa kaliwat cai,

Tusing sayang teken jiwa,

Mirib suba andel pisan,

Awanan cai teka mai,

Nangtang mayuda,

Nah yatnain iban cai.

 

213.    Raris mayuda, Sang Subali lan Sugriwa,

Wireh sami klintang brangti,

Sami pada mawisesa,

Saling jagur saling jambak,

Sang Ramadewa angob ngaksi,

Pamuputnya,

Sang Sugriwa kasor yukti.

 

214.    Sang Ramadewa, Nenten sida antuk medayang,

Wireh pateh kaaksi,

Mwastu wangde nibakang panah,

Tambis-tambis Sugriwa seda,

Yan tan gelis dane melaib,

Ring Sang Rama,

Dane matur sapuniki.

 

PUPUH GINADA

215.    Uduh ratu Sang Ramadewa,

Napi awinan tan matitis,

Lipya maring pasubayan,

Tulung tityang mangkin ratu,

Sang Subali lintang wisesa,

Tityang ajrih,

Rehning Subali sayan kroda.

 

 

 

 

 

 

216.    Sang Sugriwa da sangsaya,

Saja bingung nira ngaksi,

Tan sida antuk ngelingan,

Reh I dewa kadi patuh,

Jani kene baan medaya,

Ngawe ciri,

Bedbed awak dewa ban plawa.

 

217.    Risampune nganggen cihna,

Sang Sugriwa mayuda malih,

Sang Subali raris kepanah,

Tan jangkayan dane runtuh,

Betel lambung dane ban panah,

Antuk brangti,

Raris matbat sang Ramadewa.

 

218.    Uduh cai Ramadewa,

Solah cai dahat weci,

Langgana nibakang panah,

Pangus cai ngawe solah Sadhu,

Mwastu kai twara ja tangar,

Dahat singid,

Cai ngardi Pangindrajala.

 

219.    Nraka gede puponin Iba,

Reh sahasa memanah kai,

Kai twah mrebat ngajak nyama,

Jatine cai kliwat letuh,

Mwastu Bapan caine pidan,

Dahat brangti,

Tur nundung cai kalas wayah,

 

220.    Cai twara pedas nawang,

Penyaman kai len teken cai,

Merebat kala matungkas,

Buwin pidan mwali adung,

Wireh mula matugelan,

Cai iriati,

Awinan kai kematiang.

 

 

 

 

 

 

 

221.    Pidan solah cai melah,

Turin kasub maring gumi,

Nejani nungkalik pisan,

Mirib cai kaliwat seduk,

Mwastu engsap teken swadharma,

Ratu luwih,

Ah tusing sadhu cai Rama.

 

222.    Cai tresna teken Sugriwa,

Bojog nista lintang weci,

Bapan cai milu nraka,

Reh laksanan cai tan patut,

Tusing ngrahayuang jagat,

Nenten asin,

Parisantanan Dasaratha.

 

223.    Akweh pisan Subali matbat,

Antuk banget manah brangti,

Nanging Ida Sang Ramadewa,

Nyawis tan kehanan bendu,

Ida peragayan Utama,

Sang Subali,

Nuli kaicen warah-warah.

 

PUPUH SEMARANDANA

224.    Uduh Kapiraja Bali,

Eda pesan salit arsa,

Nira nyalanang Swadharma,

Nabdabang kerahayuan jagat,

Ento krana nibakang panah,

Reh laksanane mamurug,

 

225.    Sugriwa nira tresnain,

Nira tusing ja iwang,

Manut swadarman sawitra,

Upasaksi maka jalaran,

Ksatrya luwih katinutang,

Taler solah sang mraga Sadhu,

Muwah solah Putra Sesana.

 

 

 

 

 

 

 

226.    Solah nira memati-mati,

Maring buron nto kawenang,

Ane ada di alas wayah,

Tusing ngitung patut iwang,

Pamekas cai dahat corah,

Nira tuwah ane muput,

Krana cai matiang nira.

 

227.    Solah cai suba uningin,

I Sugriwa belasang iba,

Somahnya laut cai nyuwang,

Matin cai tan nemu nraka,

Wireh kai pacang ngruwat,

Apang cai swrga pangguh,

Keto Subali apang tatas.

 

228.    Sayan meneng Sang Subali,

Wireh tuwah kapesajan,

Sayan aes tur kaleson,

Eling maring solah iwang,

Tur ngebakti nunas ica,

Mangda sida gelis puput,

Manut wecanan Sang Rama.

 

229.    Inggih ratu lintang luwih,

Mademang sekancan corah,

Ngardi ayu maring jagat,

Mangkin wenten pinunas tityang,

Pyanak tityang Sang Anggada,

Ledang ratu swecanin ipun,

Mangda nenten kasedayang.

 

230.    Duh Sugriwa paekin beli,

Beli pacang ninggal Idewa,

Wireh suba panumaya,

Madak sida riwekasan,

Manumadi ajak dadwa,

Maring alase mapunduh,

Adi ngemban Sang Anggada.

 

 

 

 

 

 

 

231.    Solah beli saja pelih,

Nanging boya saking tuwas,

Titah Sang Hyang Widhi Wasa,

Tusing dadi pacang piwal,

Ene ada bunga Emas,

Mangda becik adi nyungsung,

Ampura beli ninggal Idewa.

 

232.    Sang Sugriwa mapisinggih,

Maring titah rakan Ida,

Sang Subali raris seda,

Kapurnayang olih Sang Rama,

Wadwa wenara sami nyembah,

Sugriwa kabiseka Ratu,

Sang Anggada Raja Putra.

 

233.    Singgih Ratu Sang Rama luwih,

Tityang ngaturang suksema,

Sida puput lampah tityang,

Nanging Ratu ledang nyantos,

Mangda wusan masan hujan,

Dewi Sita jagi karuruh,

Nglantur ngebug Jagat Lengka.

 

PUPUH DANGDANG

234.    Sundara Kanda, anggen menyambungin indik crita,

Sami egar wenarene,

Mapasangan eluh mwani,

Kejag-kejog duwur taru,

Mamuponin kalegan hati,

Wireh nampih sasih Kapat,

Ne kaacep siang dalu,

Masan kangkang suba wusan,

Magentos hujan,

Taru-taru sane ligir,

Sampun medon tur mabuwah.

 

 

 

 

 

 

 

 

 

 

235.    Sang Sugriwa, caritayang sane mangkin lan Dewi Tara,

Maring Gua Raja ne,

Dahat ledang sareng kalih,

Wireh sampun mwali matemu,

Meangkepan sareng rabi,

Napi malih masan hujan,

Ngawetuang manah ulangun,

Maduluran Semara Tantra,

Mwastu lipya,

Maring subayane riyin,

Pitwi wusan masan hujan.

 

GAMBUH

236.    Indik Sugriwa andegang dumun,

Sang Ramadewa mangkin wuwus,

Maring gunung Malyawan Ida sedih,

Rehning masan sabeh puput,

Masan kangkang raris ngentos,

 

237.    Mangen-angen Ida ring kayun,

Sang Hyang Wulan mengpeng Agung,

Kerasayang kadi prerain Sita Dewi,

Sayan lami sayan sungsut,

Ring Laksmana ngandika alon.

 

238.    Uduh adi Laksmana bagus,

Masan sabeh suba suwud,

Nging Sugriwa dahat letuh linyok jan,

Lautang jani Sugriwa ruruh,

Mirib kedalon iya makukup.

 

239.    Reh subaya tan kalingu,

Tibakin danda ane manut,

Pragatang iya yening nungkasin Beli,

Sang Laksmana nyembah matur,

Tityang ngiring titah Beli Agung

 

PUPUH GINADA

240.    Tan critanen maring marga

Sang Laksmana kocap prapti,

Maring Gua Kiskinda Raja

Sang Hanoman raris matur,

Durus ngranjing kajerowan,

Kacingak raris,

Sang Sugriwa lan Dyah Tara.

241.    Sang Sugriwa gelis nyembah,

Saha atur nunas sisip,

Antuk lipya ring subaya,

Janten Sang Rama lintang bendu,

Mangkin tityang mapidabdab,

Ngatag sami,

Panjak tityang watek wenara.

 

242.    Sapunika atur Sugriwa,

Raris ngatag Wenara sami,

Ngungsi gunung Maliyawan,

Irika Sang Rama malungguh,

Sang Sugriwa ngaturang sembah,

Wenara sami,

Manyelempuh nunas lugra.

 

243.    Sugriwa matur risang Rama,

Naweg tityang linyok janji,

Lali tityang ring paswecan,

Maliyang-liyang katungkul,

Nenten uning ka upapira,

Punyah paling,

Kaliput manah momo angkara

 

244.    Sapengrawuh Sang Laksmana,

Sikian tityang wawu eling,

Ring pidabdab tityang iwang,

Yuktin tityang tuna tutur,

Boya tityang purun piwal,

Sampunang ligi,

Ratu waneh mapasweca.

 

245.    Mangkin sampun panumaya,

Tityang nyihnayang magusti,

Jaga ngrereh Dewi Sita,

Sampunang malih sungsut kayun,

Sang Hanoman maka Duta,

Ngemaranin,

Sang Rahwana maring Lengka.

 

 

 

 

 

 

 

246.    Sapunika atur Sugriwa,

Sang Ramadewa ledang mangkin,

Wenarane sami wisesa,

Raris ida mapikayun,

Pastika padem Sang Rahwana,

Turin basmi,

Watek corah maring Lengka.

 

247.    Sang Rama raris ngandika,

Uduh paman Sugriwa luwih,

Lawutang jani mapidabdab,

Mangda sami pada igum,

Sajeroning ngardi wiweka,

Tur yatnain,

Jagat lengka Madurgama.

Berbagi :