Gaguritan Aji Janantaka
SINOM
1.
Geng ampura
lungsur titiang
Ring para manggala sami
Pangkah titiang nyeritayang
Antuk meled mangda uning
Aji Janantaka suci
Kocap wenten Sang Perabu
Panagara Janantaka
Sang Partipa ne kawarni
Lintang adung
Dados sang ngewasa jagat
2.
Panjak Ida
yukti katah
Madue patih limang diri
Kaping siki Patih Matwa
Sang Rangga nekaping kalih
Arya sane kaping teri
Kaping empate Tumenggung
Kadean nekaping lima
Durung jangkep maka sami
Jaga lantur
Nguningayang mangda tatas
3.
Kaabih olih
punggawa
Prabekel pecalang malih
Klian banjar kasinoman
Kudang warsa sampun lami
Dwaning titah Sang Hyang Widi
Penangkan bayane rauh
Sang Prabu kena gering rahat
Taler para patih sami
Lintang sungsut
Ida Sang Prabu Partipa
4.
Raris
ngwentenang paruman
Sang Prabu ngandika raris
Nah paman ajak makejang
Sawireh makejang sakti
Sarat kayun gelah jani
Paman apang sida rauh
Tangkil ring Betara Dharma
Uningayang gelah sakti
Ida nglebur
Sungkan panjake makejang
5.
Sampun puput
peparuman
Patih Matwa ngaturang bakti
Mapamit raris memarga
Tukad jurang kalintangin
Suarga lokane kaungsi
Mangda prasida kepangguh
Linggihe Betara Dharma
Mangda Ida manywecanin
Sampun rauh
Patih Matwa maring swarga
GINADA
6.
Lantur mangkin
nyeritayang
Betara Dharma malinggih
Linggihe ring singasana
Para resine pamucuk
Raris Ida mengatonang
Dane Patih
Ngaturang pengastungkara
7.
Ratu titiang
nunas lugra
Sarat mangda sida tangkil
Wenten ne pacang aturang
Wantah ngaturang pakewuh
Betara Dharma ngandika
Uduh cening
Nyen sujatine idewa
8.
Titiang saking
mercapada
Kautus mangda je tangkil
Olih Sang Prabu Partipa
Sarat jaga nunas tulung
Panjak Ida sami sungkan
Keni gering
Tan sida molihang tamba
9.
Mangkin
lungsur mangda ledang
Nglebur malan titiang sami
Alon atur Patih Matwa
Nyawis Betara mapungu
Nah yan keto atur dewa
Dahat sungkil
Ento ngawi leteh jagat
10. Bapa tusing mresidayang
Prade nu nongos di Puri
Melahan cening matilar
Bapa pacang mapitulung
Pacang sida mangelukat
Malan cening
Tan sida icalang balian
SEMARANDANA
11. Inggih ratu titiang ngiring
Ring dija nika genahne
Atur dane Patih Matwa
Betara Dharma ngandika
Nah melahang madingehang
Ada alas lintang agung
Ane madan alas Pringga
12. Kema cening patut ngungsi
Matur malih Patih Matwa
Titiang nglungsur swecan Betara
Ledang mancut urip titiang
Mangda tan ngletehin jagat
Sungkan ngwi manah kimud
Patut I Ratu mademang
13. Uduh cening, cening Patih
Yan keto kayun ceninge
Ne ada paican bapa
Tirta panglepas prana
Daun base teken pamor
Alas Pringgane katuju
Ditu tunas pican bapa
14. Pedas cening lakar mati
Bulan pitung dina sengkerne
Dadi taru maka samian
Ditu mara lebur bapa
Patih Matwa jaga budal
Ceritanan sampun rauh
Ring Negara Janantaka
15. Raris tangkil maring Puri
Nguningang pican Idane
Sungkane kalintang rahat
Tan dados icalang balian
Mangda ja ratu matilar
Mangda peresida rauh
Irika ring alas Pringga
MASKUMAMBANG
16. Uduh paman
Dauhin panjake sami
Apanga sayaga
Tetujone jaga ngungsi
Penujune alas Pringga
17. Gagesonan
Patih Matwa menawuhin
Nywarayang gendongan
Panjake samian tangkil
Sang Prabu raris ngandika
18. Panjak nira
Nejani jalan mengungsi
Wit Betara Dharma
Mangda ja makejang ngungsi
Pengungsine alas Pringga
19. Ditu jalan
Nunas ica sareng sami
Nunas pican Ida
Panjake sami mangiring
Manahnyane lintang egar
20. Sampun prapta
Raris Sang Prabu nauhin
Paman Patih Matwa
Mangda sami katibakin
Tirta panglepas perana
SINOM
21. Ring sor taru merarean
Panjake sami mangiring
Uduh paman Patih Matwa
Tiwakang picane sami
Sami raris kapicain
Panglepas prana sedah apuh
Sampun tutug sengkernyane
Bulan pitung dina pasti
Sami lampus
Rauh Sang Prabu Partipa
22. Lantur mangkin nguningayang
Dados taru manylewedi
Sang Prabu dados taru nangka
Dados teges para patih
Para arya teep mentik
Rangga dados taru sentul
Taru tangi demung menados
Demang dados taru kladi
Ki Tumenggung
Taru kepundung menados
23. Prebekel dados taru bengkel
Pecalang menados boni
Klian banjar dados pulet
Tios ring punika sami
Taru rerencek menadi
Kudang warsa sampun rauh
Bawosang Betara Dharma
Eling ring wecana nguni
Mapikayun
Jaga ngungsi alas Pringga
24. Sampun rauh maring alas
Rauh bayur lan gempinis
Nyujur ring ajeng Betara
Nangkil ipun sareng kalih
Ratu rauh saking napi
Napi wenten karya agung
Betara Dharma ngandika
Uduh bayur lan gempinis
Saja bingung
Bapa teka uli swarga
GINANTI
25. Kayun bapa wantah nglebur
Sang Prabu panjake sami
Ne ada di alas Pringga
Ane gering cukil daki
Patut cening matujuhang
Mangdane iwang pangungsi
26. Taru sareng kalih matur
Sang Prabu dija malinggih
Sang Perabu sampun seda
Dados taru mangka mangkin
Raris sang kalih ngiringang
Nyujur genah ne kaungsi
27. Ceritanan sampun rauh
Ring genahe ne kaungsi
Dados Sang Prabu kacingak
Sang Prabu ngaturang bakti
Woh tarune nedeng tasak
Mawinan nyambrama sami
GINADA
28. Taru nangka matur banban
Ledang rauh kadi mangkin
Genah titiang lintang nista
Betara Dharma raris mapungu
Uduh cening sinamian
Wireh cening
Nu maperagayan papa
29. Sing dadi nampi aturan
Yan cening mawali suci
Nguda bapa tusing nrima
Para taru sami matur
Mangda sida ketambanan
Tirta suci
Tirta panglebur mala
30. Hyang Darma nguncarang weda
Ngetisang tirtane sami
Para tarune sayaga
Pican idane kalungsur
Kalukat maka samian
Uduh cening
Pirengang piteket bapa
31. Wangsan ceninge ingetang
Duk dados manusa nguni
Uduh cening taru nangka
Reh cening dados Sang Prabu
Les ceninge madan ketewel
To kipatih
Taru jati kedadosang
32. Para arya taru teep
Dwaning tetep mengastiti
Uduh cening cening rangga
Cening dados taru sentul
Cening demung dados tangi
Wireh cening
Mapawungu ne setata
33. Taru kladi cening demang
Duk menadi senapati
Weruh ring daya upaya
Tumenggung dadi kepundung
Lintang abot karyan dewa
Dwaning cening
Pageh ngeyasayang jagat
34. Bawosang para punggawa
Taru bengkel nemenadi
Tau unduk krama banjar
Klian banjar boni taru
Kasinoman taru pulet
Karyan cening
Jati dadi juru arah
SEMARANDANA
35. Cening watek taru sami
Pirengang warah bapane
Jani bapa mapaica
Tarune gering makejang
Tan dados anggen perhyangan
Reh ngawinang jagat letuh
Dadi anggon lakar umah
36. Pirengang pesan ento cening
Ngawit mangkin rauh wekase
Tan tinut ring sapewarah
Wastu pacang nemu ala
Sapa sira ne nruenang
Janten kirang pangan kinum
Jagate lakar uru ara
37. Ne ada pewarah buin
Taru cuntaka sekancane
Embud ati bengkulitan
Taru soca nyuun lambang
Tusing dadi anggon saka
Masoca menengang sunduk
Ingetang pewarah bapa
DURMA
38. Sampun puput Ida Betara nglebur mala
Wit Janantaka ke Puri
Saget taru prapta
Miikne maimpugan
Marerod jaga pacang tangkil
Ring Hyang Darma
Gagesonan ipun memargi
39. Taru-tarune punika akeh pisan
Taru cempaka putih
Taru cendana
Taler itaru menyan
Taru cempaka kuning
Taler wenten prapta
I taru nagasari
40. Pakulun betara sesuunan titiang
Rauh titiange tangkil
Agung sinampura
Banget lungsur pasuecan
Nglungsur tirta sane suci
Panglebur mala
Mangda titiang jati suci
PANGKUR
41. Uduh taru sinamian
Kangen bapa teken atur cening
Bapa apang tatas malu
Tongos ceninge makejang
Meled bapa menatasang mangda
weruh
I taru laut nguningang
Wit ipune sareng sami
42. Raris ipun nguningayang
Mangda ledang ratu ngaksi
mangkin
Kaler kangin alas iku
Durusang ratu memarga
Betara ledang nyujur genah i
taru
Nah jalan iringang bapa
Egar kayune mangiring
43. Wargannya itaru mendak
Maserana sarwa sane miik
Ida yukti ledang kayun
Sekancan taru sami nyanggra
Wantah sarat, sane mangkin jaga
lungsur
Ledang ngicen panglukatan
Taler pewarah nepasti
44. Raris ida nguncar weda
Ngicen tirta panglukatan suci
Sekancan ipun itaru
Minakadi icendana
Taru menyan, taru sari pala
taru
Taru damulir kuanitan
Boni sari cempaka putih
45. Cempaka kuning taru tanjung
Taru nagasari taler piling
Croring waru rot waru taluh
Sekancan miik lianan
Sami polih panugrahan sane
patut
Betara raris ngandika
Sekancan tarune miik
GINADA
46. Da pesan idewa lipia
Taru cendana muah sai
Brahmana kemenuh wangsa
Cening meraga kaluhur
Brahmana manuaba
Mawit saking
Majegau lan cepaka
47. Taru demulir kuanitan
I kejimas boni sari
Piling Brahmana keniten
Taru pala menyan bayur
Taru gempinis bantawas
Wangsan cening
Dados Brahmana antapan
48. Cening taru kaliasem
Brahmana buda cening
Dadi anggon perhyangan
To cening ajak tatelu
Gempinis bayur bentawas
Wenang cening
Anggon sekancan wangunan
49. Sapunika wecanan Ida
Sareng tiga mangubakti
Cening tusing kena ila
Pamekas cening tatelu
Elingang piteket bapa
Titiang ngiring
Sapituduh Hyang Betara
SINOM
50. Makeh tarune malukat
Betara ngandika malih
Taru miik nemakejang
Wangunan Betara cening
Pratima arca mekadi
Nah cening cendana taru
Apang nawang paundukan
Sang Hyang Prama Siwa cening
Majegau
Peragayan Sada Siwa
51. Cepaka putih idewa
Meraga Hyang Siwa cening
Ajak tatelu pamekas
Sang Hyang Siwa tiga jati
Dadi urip taru sami
Dadi idep sabda bayu
Cepaka putih wit sabda
Cendana marupa idep
Majegau
Menados bayu idewa
52. Nah ne buin piteket bapa
Cendana pragan Betari
Majegau mraga brahma
Kawibawan cepaka kuning
Taru boni ambu miik
Makejang pragayan wiku
Taru piling Sang Hyang Tunggal
Ento cening taru sari
Cening patut
Mangge ring sanggah kemulan
53. Sane mangkin ceritayang
I taru cepaka wilis
Nenten nunas panugrahan
Betara raris memargi
Liang manah taru sami
Tan dumade saget rauh
Saha nangkil ring betara
Cepaka wilis ngubakti
Saha atur
Titiang nglungsur pangampura
54. Mangkin titiang lintang sarat
Nunas ring singgih betari
Mapaica panugrahan
Mangden titiang taler suci
Rasa nirdon kadi mangkin
Kaliput antuk iletuh
Mangda ledang ratu nyupat
Mogi sida pateh sami
Keto atur
Cepaka wilis manyumbah
DURMA
55. Sada banban Betara Dharma ngandika
Cening cepaka wilis
Kangen saja bapa
Miragi atur dewa
Da dewa nyebetang jani
Sawireh bapa
Suba suud kapicain
56. Wireh cening tusing rungu teken bapa
Rasa cening tan maprih
Bapa mapaica
Sekadi salah trima
Duk pangrauh bapa mai
Ento makrana
Sing sida kapicain
57. Ngawit jani dewa kagentosin parab
Nguni cepaka wilis
Jani parab dewa
Madan i taru base
Wireh cening tonden suci
Kerangkub kala
Kayu kasepan twi cening
58. Dumadak manusa sami kawekasan
Tusing nganggon cening
Sarwa wewangunan
Umah muah perhyangan
Perhyangan wit taru base
Betara ninggal
Tan kayun ida malinggih
GINANTI
59. Prade cening kanggen lumbung
Sang Hyang amerta ninggalin
Sane nganggo janten meweh
Reh pangane maninggalin
Taler metu koos dadas
Keto abot pastun cening
60. Yan ring paon cening mlungguh
Sing pegatan keni gering
Tusing sida molih tamba
Kaumahin buta cuil
Sapunika wecanan ida
Taru base nguntul sedih
MASKUMAMBANG
61. Mangkin crita
Wenten malih taru tangkil
Ring Ida Betara
Ipun sami ngasi-asi
Mangdane ipun kalukat
62. Taru nika
Sidem blalu taru sampit
Juet lan katekek
Mangda ipun kapicain
Sida dosane matinggal
63. Uduh dewa
Makejang ne mara tangkil
Ne jani pirengang
Bapa miteketin cening
Wigunan dewa makejang
64. Wenang dewa
Lakar jineng lumbung klingking
Muah dadi paon
Peragayan widiadari
To ingetang pesan cening
SEMARANDANA
65. Ceritayang sane mangkin
Sareng penyaman ipun
Kebawosang catur sanak
Sane pinih duur mewasta
Kalikukum nekawarna
Ne madean kalimoko
Warnan ipun sada barak
66. Taru klampuak pinih tri
I klincung pinih alite
Ipun tangkil sareng patpat
Ngaturang bakti ngadpada
Atur ipun alus banban
Dwaning wawu sida rauh
Sarat nunas panglukatan
67. Taru catur sanak cening
Pirengang piteket bapane
Cening ngelah kawigunan
Lait jineng ulap-ulap
Masih dadi dedanga
Kawenangang dadi sunduk
Paon lumbung jineng wenang
68. Uduh taru klampuak cenik
Bisa nulak kancan corahe
Cening wenang dadi lawang
Sida mialangin baya
Ingetang pesan to dewa
Catur sanak raris matur
Wantah suksemayang titiang
GINADA
69. Betara pacang ka swarga
Tan critanan rauh malih
Sekancan ipun isekar
Sekar sandat sekar jepun
Sekar tigaron sebita
Kembang kuning
Tampak bela katrangan
70. Tiga kancu i kemoning
Taler sekar nagasari
Tangkil ring Ida Betara
Linggihnyane lintang manut
Majajar ring penangkilan
Daat asri
Ngawi ledang kayun ida
71. Durung matur saget prapta
Mererod pacang menangkil
Sekar gambir pudak klasa
Sekar seruni pudak cinaga
Sekar mitir taler prapta
Ngungsi linggih
Ring ajeng Ida Betara
72. Kocap wenten malih prapta
Sekar ratna gadung kasturi
Sekar teleng lan siulan
Sekar bayem harum dalu
Sami sekarnyane miik
Taler tangkil
Nampek ring Betara Dharma
73. Taler sekar wari barak
Ernawa angsokasti
Ergula sokapedapa
Angsana tangguli arum
Sekar sudamala malih
Wenten malih
Sekar tanjung kembang trate
74. I sekar palit sedangan
Sekar temen endong malih
Wenten sane durung prapta
Paling ungkur klasa arum
Katon ipun mewarni-warni
Lintang asri
Luya kadi alas sekar
75. Sarwa sekar nedeng kembang
Embunnyane dahat miik
Sinami ngaturang sembah
Sarwa sekar raris matur
Ledang ratu manugrahin
Sareng sami
Kancan sekare kalukat
76. Sampun puput ida nglukat
Raris ida mapiuning
Ne dewa sekar utama
Sareng kalih raris matur
Sekar sulatri nagasari
Wenang cening
Anggen sekar Ida Betara
77. Lantur mangkin nguningayang
Ipun i jempiring alit
Muah sekar salikonta
Nunas tirta nenten kayun
Wantah ipun sareng kalih
I jempiring
Ngawi runtuh manuludang
78. Ida Betara ngandika
Da nundung jempiring alit
Jani ia adanin bapa
Parabin bapa tulud nyuh
Salikonta malih siki
Wireh cening
Liu munyi tan pegatan
79. Sekar tulud nyuh idewa
Uled sarin bungan cening
Tusing dadi anggon banten
Ipun sareng kalih nguntul
Duk kepastu Hyang Betari
Gelis raris
Hyang Dharma ke siwa loka
PUPUT.
Posting Komentar untuk "Gaguritan Aji Janantaka"