Gaguritan Betara Gana: Wit Wenten Yadnya Matatah
DANGDANG GULA
PAMIARSA
SANE WANGIANG TITIANG SAMI
MUNGKAH UCAP
SWASTI ASTU ATUR TITIANG
MOGI LEDANG IDA DANE
MIARSAYANG TITIANG MUPUH
BETARA GANA KAGURIT
WIT WENTEN YADNYA MATATAH
SAKENG LONTAR TITIANG NEDUN
ANGGEN SULUH KAHURIPAN
AMPURAYANG
I JUGUL PANGKAH MANGURIT
LEDANG UGI NGAMPURAYANG
1.
SINOM
IDA HYANG BETARA SIWA
ISTA DEWATA RING SUARGI
ABIH RABI DEWI UMA
MANGKIN SEDENG MOBOT ALIT
HYANG SIWA MABAOS ARIS
“DEWI UMA ADI AYU
SUKSEMAN NGRAKSA BOBOTAN
KADI ANAK NANGUN YOGI
AKEH TUHU
GEGODANE RAUH MANGODA
2.
SINOM
KRAMANING NGRAKSA BOBOTAN
NGAJENG NAYUB SARWA NE TIS
LOLOHE BECIK KATUNAS
PAIT NANGING MANGETISIN
KAYUN PANG SETATA ENING
BAOSE TEN DADOS NGACUH
SOLAHE MANGDA SUSILA
YAN PUNIKA ANTUK ADI
JANTEN SAMPUN
EMBAS PUTRA SADU DARMA”
3.
GINADA
DEWI UMA RARIS NGUCAP
“TUTUR BELI LUIH GATI
PUNDUT TITIANG NAKENG TUAS”
PUNIKA HYANG UMA MATUR
YATNA MANGRAKSA BOBOTAN
MANGANUTIN
TATA TITI TUTUR TATWA
4.
GINADA
TIGANG SASIH BOBOT IDA
IDA HYANG INDRA PRAPTI
NGALINGGIHIN GAJAH AGENG
ERAWANA WASTAN IPUN
CALING NGRANYAP KADI PEDANG
UMA DEWI
KAGIAT PISAN MANYINGAK
5.
GINADA
RING SAMPUNE PANEMAYA
EMBAS OKAN UMA DEWI
PUTRA EMBAS TAWAH PISAN
ULUN IDA GAJAH TUHU
ANGGANE MRAGA DEWATA
UMA DEWI
ENGSEK NYINGAK WARNA PUTRA
6.
SEMARANDANA
HYANG UMA MATUR RING RABI
“SINGGIH BELI HYANG SIWA
TITIANG MAPLENGEK MANGETON
WARNAN PUTRA TAWAH PISAN
MRAGA DEWA MULU GAJAH
NAPI MAWINAN PUNIKU
LEDANG BELI MANARTAYANG”
7.
SEMARANDANA
HYANG SIWA GELIS MANYAWIS
“OKA EMBAS SALAH RUPA
RIIN DAWEG ADI MOBOT
ADI NAENIN MAKESIAB
NYINGAK GAJAH HYANG INDRA
SETATA MARAWAT RING KAYUN
GOBAN GAJAH NGRESIN MANAH
8.
GINANTI
UDUH ADI RABIN INGSUN
DIASTUN OKA TAWAH GATI
BELI NGIDIH KEN I DEWA
REH ENTO PANAK PADIDI
EDA NGELAH KENEH SEBET
NGUPAPIRA RAGAN CENING”
9.
GINANTI
DEWI UMA NYAWIS LANTUR
“YUKTI KADI BAOS BELI
KAON BECIK WARNAN PUTRA
BUAH WETENGE PADIDI
TITIANG PINAKA RERAMA
PATUT NGEMBAN NEKENG ATI”
10.
GINANTI
HYANG SIWA MALIH MAWUWUS
“ADI TUHU IBU JATI
DIASTUN KAON I PIANAK
NENTEN KEMAD MANGANGKENIN
BELI MAANG CENING ADAN
HYANG GANA KAWASTANIN”
11.
SINOM
IDA HYANG BETARA GANA
GELIS DUUR NUDUT ATI
SOLAH IDA SADU DARMA
BAKTI MARING IBU AJI
MARING KANTI SIH KUMASIH
RAUHING RING SATO TARU
MAKA SAMI KASAYANGANG
IDA ULENG MLAJAH AJI
WAGED TUHU
MARING SALUIR KANDA SASTRA
12.
SINOM
KACRITA RING SENAPURA
WENTEN DETIA NYAKRAWERTI
MAPARAB NILA RUDRAKA
KASUB MAWISESA SAKTI
METU SOLAH SUMBUNG GATI
SOLAH NYAPA KADI AKU
NGURUGADA RING BUANA
PARA RATU NUNGKUL JERIH
MANGKIN LANTUR
NGAMARANIN SURALOKA
13.
MIJIL
SADA ALUS
HYANG SIWA MAWISIK
“UDUH DETIA KAOT
TUMBEN NGRAUHIN DEWEK NIRANE
APA ADA NE SARATANG ALIH
ORAHANG DIGELIS
APANG NIRA WERUH”
14.
GINADA
NILA RUDRAKA MANIMBAL
“INGONG MELED ULI NGUNI
MADEG AGUNG TAN PAPADA
ENTO SUBA TAMPI INGSUN
PARA RATU DI BUANA
ONYA JERIH
NYADPADA NGATURANG JAGAT
15.
GINADA
NANGING INGONG NU KUANGAN
SUARGANE SING BAKAT GISI
ENTO DASAR INGONG TEKA
SUARGAN RATU IDIH INGSUN
YAN I RATU BANI TULAK
SUBA PASTI
INGONG KAL NGREJEK DEWA”
16.
PANGKUR
WAWU PUNIKA I DETIA
HYANG SIWA DUKA PISAN RARIS NYAWIS
“IH CAI DETIA BEGUG
MARA SAKTI MAWISESA
METU SOMBONG SOLAH NYAPA KADI AKU
JANI SANDANG DOSAN IBA
URIP IBA BANCUT KAI”
17.
DURMA
HYANG SIWA RARIS NGATAG DEWA ONYA
NILA RUDRAKA NANGKEPIN
NGATAG WADUA DETIA
METU YUDA RAMES PISAN
TUR SUE MATANDING JURIT
WADUA DEWATA
AKEH MANGEMASIN PATI
18.
DURMA
HYANG SIWA RARIS GELIS NGLEPAS PANAH
KANTAN PRABU DETIA KENI
NANGING AKAS PISAN
NILA RUDRAKA MANANGSEK
HYANG SIWA KAPANTIGIN
IDA KUCIWA
PRABU DETIA ICA NGRIKIK
19.
DURMA
“NE JANI BAANG INGONG IBA MAKENEH
NANGING DINA BUIN MANI
NANH ENGGALANG PESAN
IBA NYERAHANG SUARGAN”
PUPUT NGUCAP SADA NENGKIK
NILA RUDRAKA
MATILAR SAKENG SUARGI
20.
MASKUMAMBANG
HYANG SIWA
ENGSEK TEN SIDA MANYAWIS
RARIS IDA BUDAL
HYANG GANA MARING PURI
NYANGGRA ANTUK BAOS BANBAN
21.
MASKUMAMBANG
“BAWAN YAYAH
AKSI TITIANG SEDIH KINGKING
YENING NENTEN IWANG
PASTIKA AJI KALILIH
LEDANG AJI MANARTAYANG”
22.
MASKUMAMBANG
HYANG SIWA
MANYAWIS ATUR I CENING
“ENTO SAJA PESAN
AJI KALILIH RING JURIT
PRABU DETIA SAKTI PESAN”
23.
PUCUNG
DABDAB ALUS
HYANG GANA DIGELIS MATUR
“SAMPUNANG DUHKITA
BENJANG TITIANG NGENTOS AJI
NGREJEK MUSUH
I DETIA SOLAH DURSILA”
24.
PUCUNG
RARIS AJUNG
DIGELIS IDA MAWUWUS
“UDUH CENING SAYANG
RAGAN CENING KANTUN ALIT
JANTEN ALUH
KAKASORANG OLIH MESEH”
25.
GINANTI
HYANG GANA DIGELIS MATUR
“DIASTUN TITIANG KANTUN ALIT
TITIANG NENTEN LAGES NYINGAK
AJI NANDANG SEDIH KINGKING
MUNGGUING SUADARMAN PUTRA
PARAMA BELA RING AJI”
26.
GINANTI
HYANG SIWA MANYAWIS ALUS
“ATUR CENING BENEH GATI
KALA RERAMA KALARAN
PUTRA PATUT MANULUNGIN
MOGI CENING SIDA KARYA
MANANGKEPIN MESEH AJI”
27.
GINADA
BENJANGNE SEMENGAN PISAN
SANG NILA RUDRAKA PRAPTI
CAGER JAGI NGAMBIL SUARGAN
RARIS NGUCAP SADA BANGLUS
“IH DEWA BETARA SIWA
ENGGAL JANI
IBA NYERAHANG SUARGAN”
28.
GINADA
HYANG SIWA TAN PANGUCAP
NANGING HYANG GANA NE NYAWIS
“IH CAI DETIA CORAH
DA MAPETA NGULAH PESU
SATONDEN KAI KUCIWA
EDA CAI
LAKAR CAGER NYAJAH SUARGAN”
29.
PANGKUR
PUPUT NGUCAP SAPUNIKA
IDA HYANG GANA RARIS NGUNUS KERIS
NILA RUDRAKA KASUDUK
ANGGAN DETIA TEGUH AKAS
NILA RUDRAKA NGUYENG GADANE AGUNG
BETARA GANA KALEMPAG
NGRARIS REBAH RING PERTIWI
30.
PANGKUR
HYANG GANA TEN ELING RAGA
SANG NILA RUDRAKA KEDEK SUMBUNG GATI
“CAI NU MAPUPUK CEKUH
NANGTANG KAI PANGKAH PESAN”
PUPUT MUUS HYANG GANA MALIH KAPUPUG
TUR PRARAINE KALEMPAG
SIUNGNE ELUNG AKATIH
31.
DURMA
WAWU ELUNG SIUNG IDA HYANG GANA
MARING RAGA WAWU ELING
IDA RARIS NGADEG
TUR ELUNGAN SIUNG IDA
KAGAMBEL KANGGEN KERIS
TUR TAWAH PISAN
DETIA MLAIB PATI SILI
32.
DURMA
HYANG GANA MALAIB NGUBER I MESEH
NILA RUDRAKA KAGISI
TUR RARIS KATUWEK
MASEDANA SIUNG IDA
DETIA NENTEN AKAS MALIH
DADANE SIGAR
RAH MALIH NGRARIS MATI
33.
DURMA
HYANG SIWA RARIS RAUH MAWECANA
“SUBA ELUNG CALING CENING
SIDA NYAYENG MESEH
NAH ENTO ANGGONG PATINGET
KAWIT YADNYA NATAH GIGI
PATUT MARGIANG
OLIH KRAMA HINDU SAMI”
DURMA
PAMIARSA SANE BANGET WANGIANG TITIANG
BETARA GANA KAGURIT
ANGGEN SULUH KRAMA
PRADE WENTEN ATUR IWANG
TITIANG NGLUNGSUR SINAMPURI
NGIRING PUPUTANG
SINEB ANTUK PRAMA SANTI
Posting Komentar untuk "Gaguritan Betara Gana: Wit Wenten Yadnya Matatah"